নগাঁও,৬ এপ্ৰিল : ই টিভি ভাৰত অসমত সম্প্ৰচাৰ হৈছিল নগাঁৱৰ বিজেপি প্ৰাৰ্থী সুৰেশ বৰাৰ এক বিশেষ সাক্ষাৎকাৰ । ই টিভি ভাৰতৰ সৈতে সেই সাক্ষাৎকাৰত কংগ্ৰেছৰ প্ৰাক্তন মন্ত্ৰী তথা ধুবুৰী লোকসভা সমষ্টিৰ কংগ্ৰেছ প্ৰাৰ্থী ৰকিবুল হুছেইনৰ সৈতে ককাই-ভাইৰ দৰে সম্পৰ্ক থকা বুলি মন্তব্য কৰিছিল সুৰেশ বৰাই । আনকি ৰকিবুল হুছেইনেই সুৰেশ বৰাক ৰাজনীতিত প্ৰতিষ্ঠা কৰাৰ কথাও উল্লেখ কৰি ধুবুৰীৰ পৰা জয়ী হৈ সাংসদলৈ নিৰ্বাচিত হ'ব বুলি আশা প্ৰকাশ কৰি হুছেইনেক শুভেচ্ছাও জনাইছিল বিজেপি প্ৰাৰ্থীগৰাকীয়ে ।
কিন্তু মাত্ৰ ৪-৫ দিন পিচতেই হঠাৎ ৰকিবুল হুছেইনক লৈ সুৰ সলনি হ'ল বিজেপি প্ৰাৰ্থী সুৰেশ বৰাৰ । শুকুৰবাৰে নিশা নিজা বাসভৱনত হঠাৎ সংবাদ মাধ্যমক সম্বোধন কৰি এইবাৰ ৰকিবুল হুছেইনৰ বিৰুদ্ধে আক্ৰমণাত্মক হৈ পৰে সুৰেশ বৰা । ইফালে বিজেপি প্ৰাৰ্থী সুৰেশ বৰাৰ পাপ থকাৰ বাবেই বিগত তিনিটাকৈ নিৰ্বাচনত কংগ্ৰেছে প্ৰাৰ্থিত্ব দিয়াৰ পিচতো বিধানসভাত সুৰেশ বৰা জয়ী হ’ব পৰা নাই বুলি ৰকিবুল হুছেইনে কৰি অহা কটাক্ষৰ অৱশেষত প্ৰত্যুত্তৰ দিলে সুৰেশ বৰাই ।
বিগত সময়ত অন্যায়ৰ পক্ষত থকাৰ কথা উল্লেখ কৰি মহাভাৰতৰ প্ৰসংগ উল্লেখ কৰিলে সুৰেশ বৰাই । বিগত সময়ত 'কৌৰৱ'ৰ লগত থকাটোৱেই পাপ আছিল যাৰ বাবে তেওঁ জয়ী হ'ব পৰা নাই বুলি দাবী কৰিলে বিজেপি প্ৰাৰ্থী সুৰেশ বৰাই । বিগত সময়ত কংগ্ৰেছত থকাটোৱেই যে পাপ আছিল সেয়া এইবাৰ নিৰ্বাচনৰ ফলাফলে প্ৰমাণ কৰিব বুলিও মন্তব্য কৰে সুৰেশ বৰাই ।
ইফালে সংবাদ মাধ্যমৰ সন্মুখত কংগ্ৰেছ প্ৰাৰ্থী প্ৰদ্যুৎ বৰদলৈকো সমালোচনা কৰে সুৰেশ বৰাই । কংগ্ৰেছ প্ৰাৰ্থী প্ৰদ্যুৎ বৰদলৈয়ে মনে মনে গৈ এ আই ইউ ডি এফৰ প্ৰাৰ্থী আমিনুল ইছলামক সাক্ষাৎ কৰে বুলি তেওঁ অভিযোগ কৰে । এ আই ইউ ডি এফৰ সমৰ্থন বিচৰা প্ৰদ্যুৎ বৰদলৈক এতিয়া অসমীয়া ৰাইজে চিনি পোৱাটো উচিত বুলিও মন্তব্য কৰে বিজেপি প্ৰাৰ্থী সুৰেশ বৰাই ।
