নিউজ ডেস্ক, ২৫ মে' : আৰ জে ডি প্ৰধান লালুপ্ৰসাদ যাদৱে পুনৰবাৰ সামাজিক মাধ্যমৰ জৰিয়তে প্ৰধানমন্ত্ৰী নৰেন্দ্ৰ মোদীক আক্ৰমণৰ লক্ষ্য কৰি লৈছে । এক্সত লালুপ্ৰসাদ যাদৱে পুনৰবাৰ প্ৰধানমন্ত্ৰী নৰেন্দ্ৰ মোদীক কেইটামান প্ৰশ্ন সুধিছে । লগতে তেওঁ সংবাদ মাধ্যমকো সমালোচনা কৰে ।
'২ কোটি চাকৰি দিয়াৰ প্ৰতিশ্ৰুতি কি হ'ল ?' তেওঁ ছ'চিয়েল মিডিয়া প্লেটফৰ্ম এক্সত মোদীক প্ৰশ্ন কৰে । লগতে লিখিছে, সাংবাদিকসকলে নৰেন্দ্ৰ মোদীৰ সাক্ষাৎকাৰ লৈ আছে, কিন্তু কোনেও সাংবাদিকতাৰ কৰ্তব্য পালন কৰা নাই । ভয়ত কোনেও প্ৰধানমন্ত্ৰীক সোধা নাই, "আপুনি বছৰি 2 কোটি চাকৰি দিয়াৰ প্ৰতিশ্ৰুতি দিছিল, সেই প্ৰতিশ্ৰুতিৰ কি হ'ল ? কিহৰ ভিত্তিত আপুনি সেই প্ৰতিশ্ৰুতি দিছিল ?"
লালুৱে প্ৰধানমন্ত্ৰীক প্ৰশ্ন কৰে, "আপুনি কৈছিল যে লাখ লাখ কোটি ক'লাধন বিদেশত আছে, সকলোৰে একাউণ্টত ১৫-১৫ লাখ টকাকৈ এনেয়ে আহিব । কিন্তু সেয়া কিয় অহা নাই ? কোনো সাংবাদিকে এইটো কথা সুধিছেনে ? আপুনি গঙ্গা পৰিষ্কাৰ কৰাৰ কথা কৈছিল ? তাৰ কি হ'ল ? বৰঞ্চ গংগা মা পূৰ্বৰ তুলনাত অধিক দূষিত হৈছে । কোনো সাংবাদিকে কিয় সোধা নাই ?"
লালুৱে মোদীক ৮ টা প্ৰশ্ন সুধিছে । পূৰ্বতে দেশত কিমান ঋণ আছিল আৰু এতিয়া কিমান ? তেওঁলোকে ১০ বছৰত ঋণ চাৰিগুণ কিয় বৃদ্ধি কৰিলে ? তেওঁলোকে পুঁজিপতিৰ ২৫ লাখ কোটি টকা কিয় মাফ কৰিলে ? কোনেও বিমুদ্ৰাকৰণৰ কথা উল্লেখ কৰা নাই কিয় ? ইয়াৰ লাভালাভ বিচৰা নাই কিয় ? তেওঁৰ কাৰ্যকালত অভিলেখ ভংগকাৰী মুদ্ৰাস্ফীতি আৰু নিবনুৱাৰ সংখ্যা কিয় বৃদ্ধি পাইছে ?
তেওঁ লগতে কয় যে এয়া কোনো সাক্ষাৎকাৰ নহয়, ই হৈছে এখন চিত্ৰনাট্য । প্ৰশ্ন এটা সোধাৰ পূৰ্বে সাংবাদিকসকলে 3 মিনিটমান তেওঁৰ তৈলমৰ্দন কৰে । তাৰ পিছতহে সেপ ঢুকি ঢুকি প্ৰশ্ন এটা সোধে । ইমান বেছিও হ'ব নালাগে ।
উল্লেখ্য যে প্ৰধানমন্ত্ৰী নৰেন্দ্ৰ মোদীৰ প্ৰতিটো বিহাৰ ভ্ৰমণৰ পূৰ্বে লালুপ্ৰসাদ যাদৱে ছ'চিয়েল মিডিয়াৰ জৰিয়তে তেওঁক আক্ৰমণৰ লক্ষ্য কৰি লয় । আনহাতে, মোদীয়েও নিৰ্বাচনী সভাত ইয়াৰ উত্তৰ দিয়ে । শনিবাৰে নৰেন্দ্ৰ মোদীৰ বিহাৰত তিনিখন নিৰ্বাচনী জনসভা আছে । তেওঁ বাক্সাৰ, কাৰাকাট আৰু বিক্ৰমত নিৰ্বাচনী সভা সম্বোধন কৰিছে । প্ৰতিখন নিৰ্বাচনী সভাতে প্ৰধানমন্ত্ৰীয়ে লালুপ্ৰসাদ যাদৱ আৰু তেওঁৰ পৰিয়ালক লক্ষ্য কৰি লৈছে ।
