নেশ্যনেল ডেস্ক,১৮ মে': অৱশেষত আৰক্ষীৰ জালত পৰিল দিল্লীৰ সাংসদ স্বাতী মালিৱাল আক্ৰমণ গোচৰৰ অভিযুক্ত বিভৱ কুমাৰ । আটক হোৱাৰ পূৰ্বে দিল্লীৰ মুখ্যমন্ত্ৰী কেজৰিৱালৰ ব্যক্তিগত সচিব বিভৱ কুমাৰে ইমেইলযোগে উত্তৰ দিল্লী জিলাৰ অন্তৰ্গত ভিজিলেন্স আৰক্ষী থানাত স্বাতী মালিৱালৰ বিৰুদ্ধে অভিযোগো দাখিল কৰিলে । ইমেইলযোগে তেওঁ সাংসদ স্বাতী মালিৱালৰ বিৰুদ্ধে গুৰুতৰ অভিযোগ উত্থাপন কৰিছে । তেওঁ অভিযোগ কৰা মতে স্বাতী মালিৱালে মুখ্যমন্ত্ৰীৰ বাসগৃহত বলপূৰ্বকভাৱে প্ৰৱেশৰ চেষ্টা কৰিছিল আৰু মুখ্যমন্ত্ৰীৰ নিৰাপত্তাৰ প্ৰতি ভাবুকি দিছিল ।
অৱশ্যে, এতিয়ালৈকে দিল্লী আৰক্ষীয়ে এই সন্দৰ্ভত কোনো ব্যৱস্থা গ্ৰহণ কৰা নাই । দিল্লী আৰক্ষীয়ে আম আদমি পাৰ্টীৰ ৰাজ্যসভাৰ সাংসদ স্বাতী মালিৱালক আক্ৰমণ আৰু দুৰ্ব্যৱহাৰৰ অভিযোগত এটা গোচৰ ৰুজু কৰিছিল আৰু গোচৰটোৰ অভিযুক্ত বিভৱক আটক কৰিছে ।
ইফালে দিল্লী আৰক্ষীলৈ বিভৱ কুমাৰে প্ৰেৰণ কৰা ইমেইল অনুসৰি যেতিয়া স্বাতী মালিৱালক মুখ্যমন্ত্ৰীৰ বাসগৃহৰ পৰা ওলাই যাবলৈ কোৱা হৈছিল তেতিয়া তেওঁক ঠেলি দিছিল আৰু মিছা গোচৰত জড়িত কৰাৰ ভাবুকি দিছিল ।
কুমাৰে তেওঁৰ ইমেইলত এই গোটেই বিষয়টো ১১ টা পইণ্টত উল্লেখ কৰিছে । তেওঁ দিল্লী আৰক্ষীক স্বাতী মালিৱালৰ বিৰুদ্ধে উপযুক্ত আইনী ব্যৱস্থা ল'বলৈও দাবী জনাইছে । আৰক্ষীয়ে এই ইমেইল সন্দৰ্ভত কোনো স্পষ্টীকৰণ দিয়া নাই ।
মুখ্যমন্ত্ৰীৰ ঘনিষ্ঠ বিভৱ কুমাৰে উত্তৰ দিল্লী জিলা আৰক্ষী আৰু চিভিল লাইনছ আৰক্ষী থানালৈ এই ইমেইল প্ৰেৰণ কৰিছে বুলি জানিব পৰা গৈছে । বিভৱ কুমাৰে দাবী কৰিছে যে স্বাতী মালিৱালে অনুমতি অবিহনে মুখ্যমন্ত্ৰীৰ বাসগৃহত প্ৰৱেশৰ চেষ্টা কৰিছিল । মুখ্যমন্ত্ৰীক সাক্ষাতৰ বাবে তেওঁ পূৰ্বে অনুমতি লোৱাও নাছিল । অনুমতি অবিহনে তেওঁক মুখ্যমন্ত্ৰীৰ বাসগৃহত প্ৰৱেশত বাধা দিয়াৰ বাবে কৰ্মচাৰীক গালি-গালাজ কৰিছিল বুলিও বিভৱ কুমাৰে অভিযোগ কৰিছে । কুমাৰে ইমেইলটোত উল্লেখ কৰা মতে স্বাতী মালিৱালক অপেক্ষা কৰিবলৈ কোৱা হৈছিল যদিও তেওঁ শুনা নাছিল ।
লক্ষণীয়ভাৱে বিভৱ কুমাৰৰ এই অভিযোগৰ পিচতে স্বাতী মালিৱাল আক্ৰমণ গোচৰটোৱে নতুন ৰূপ লৈছে । অৱশ্যে এই সন্দৰ্ভত আৰক্ষীৰ প্ৰতিক্ৰিয়া কি হ'ব সেয়া গুৰুত্বপূৰ্ণ হ'ব ।
