اننت ناگ: آوارہ مویشیوں سے راہگیر پریشان

جنوبی کشمیر کے ضلع اننت ناگ میں آوارہ مویشیوں کی وجہ سے راہگیروں، گاڑی والوں کو مشکلات کا سامنا کرنا پڑتا ہے۔ لوگوں کے مطابق آوارہ مویشی قصبہ کے مختلف بازاروں، سڑکوں اور گلی کوچوں میں گھومتے رہتے ہیں۔

قصبہ اننت ناگ میں آوارہ مویشیوں کی وجہ سے راہگیروں، گاڑی والوں کو مشکلات کا سامنا کرنا پڑتا ہے۔ آوارہ مویشی قصبہ کے مختلف بازاروں، سڑکوں اور گلی کوچوں میں گھومتے رہتے ہیں، جس کی وجہ سے مقامی لوگوں اور راہگیروں کو عبور و مرور میں دشواریوں کا سامنا ہے۔

مقامی لوگوں کے مطابق آوارہ مویشیوں کی وجہ سے قصبہ میں بعض اوقات ٹریفک کی نقل و حمل بھی متاثر ہو رہی ہے، جو ٹریفک جام کا بھی سبب بنتا ہے۔

ضلع اننت ناگ کے مہندی کدل سے لال چوک اور جنگلات منڈی گورنمنٹ میڈیکل کالج جانے والی شاہراہ پر آوارہ مویشی گھومتے رہتے ہیں، جس کی وجہ سے مریضوں کو ہسپتال لے جانے یا ریفر کرنے کے دوران آوارہ مویشی رکاوٹیں کھڑی کر رہے ہیں۔ وہیں سڑکوں اور اہم مقامات پر گوبر کی وجہ سے شہر کی خوبصورتی پر بھی اثر پڑ رہا ہے۔

لوگوں نے میونسپل حکام سے اپیل کرتے ہوئے کہا کہ وہ اس سلسلہ میں ٹھوس اقدامات اٹھائیں اور ان افراد کے خلاف کارروائی کریں جو مویشیوں کو آوارہ چھوڑ رہے ہیں۔