'నా ప్రియుడితో మాట్లాడించండి.. లేదంటే చచ్చిపోతా'

తనను ప్రేమించి... సహజీవనం చేసి ఇప్పుడు ముఖం చాటేస్తున్నాడని... ఓ యువతి పోలీసుస్టేషన్​లో హల్​చల్​ చేసింది. తన ప్రియుడిని తెచ్చివ్వమని... లేదంటే సుసైడ్​ చేసుకుంటానని బెదిరించింది. ఈ ఘటన హైదరాబాద్​లోని బాచుపల్లి పీఎస్​లో చోటుచేసుకుంది.

ఆంధ్రప్రదేశ్​ నెల్లూరుకు చెందిన అశ్విత తన కుటుంబంతో కలిసి హైదరాబాద్​లోని చిత్రపురి కాలనీలో నివాసం ఉంటుంది. బాచుపల్లిలో ఉండే చందు అనే వ్యక్తితో అశ్వితకు పబ్​లో పరిచయం ఏర్పడింది. అది కాస్త... ప్రేమగా మారి కొంత కాలం వీరిద్దరు సహజీవనం చేశారు.

ముఖం చాటేసిన ప్రియుడు...

ఈ మధ్య ప్రియుడు చందు అశ్వితకు ముఖం చాటేస్తు తప్పించుకు తిరిగుతున్నాడు. ఫోన్​లో కూడా అందుబాటులో లేకపోవడంతో విసిగిపోయిన అశ్విత ఇవాళ బాచుపల్లిలో చందు ఉండే నివాసానికి వెళ్లింది.

మాట్లాడించండి.. లేదంటే సుసైడ్​ చేసుకుంటా...

అక్కడ చందు లేకపోవడంతో కోపంతో ఉన్న అశ్విత బాచుపల్లి పీఎస్​కు వెళ్లి తన ప్రియుడిని తీసుకుని రావాలని హల్​చల్​ చేసింది. ప్రియుడితో 10 నిమిషాలు మాట్లాడించాలని లేదంటే పీఎస్​లోనే ఆత్మహత్య చేసుకుంటానని బెదిరించింది.

గతంలోనే యువతి ఇలాగే...

అశ్వితకు పోలీసులు ఎంత నచ్చచెప్పినా వినలేదు. చివరకు బాచుపల్లి సీఐ జగదీశ్వర్​ షీటీం వారిని పిలిపించి కౌన్సిలింగ్​ ఇప్పించాడు. అశ్విత అన్నను పీఎస్​కు పిలిపించి... ఆమెను అప్పజెప్పాడు. చందుని తీసుకురావడానికి ఫిర్యాదు రాసివ్వమంటే అశ్విత నిరాకరించింది. గతంలో కూడా రాయదుర్గం పీఎస్​లో ఇలానే హల్​చల్​ చేసిందని పోలీసులు తెలిపారు.

ఇదీ చూడండి: 5 ఎకరాల పొలం.. 23 రకాల పంటలు...