ఏపీ శాసనసభలో తెదేపా అధినేత చంద్రబాబు సతీమణిపై అసభ్యకరంగా మాట్లాడటం సరైందికాదని తెలుగుదేశం తెలంగాణ రాష్ట్ర అధ్యక్షుడు(telangana tdp president) బక్కని నర్సింహులు అన్నారు. హైదరాబాద్‌లోని ఎన్టీఆర్ భవన్‌లో నర్సింహులు మీడియాతో శనివారం మాట్లాడారు. ఆదివారం తెలంగాణ రాష్ట్రవ్యాప్తంగా మౌన ప్రదర్శనలు, దీక్షలు చేయాలని పార్టీ శ్రేణులకు పిలుపునిచ్చారు. అంతకుముందు పార్టీ రాష్ట్ర ముఖ్య నేతలతో సమావేశమై చర్చించారు. ఏపీ ఎంపీ కనకమేడల రవీంద్రకుమార్‌ మాట్లాడుతూ జగన్‌ పాలనలో ఏపీ అప్పుల ఊబిలో కూరుకుపోయి అప్రతిష్ఠపాలైందన్నారు. వైకాపాను ప్రజలు తరిమికొట్టడం ఖాయమన్నారు.
చంద్రబాబు కన్నీటిపర్యంతం
ఆంధ్రప్రదేశ్ శాసనసభలో జరిగిన పరిణామాలపై తెదేపా అధినేత, ప్రతిపక్ష నేత చంద్రబాబు తీవ్ర భావోద్వేగానికి(Chandrababu crying) గురయ్యారు. వైకాపా సభ్యులు.. ఏకంగా ఆయన సతీమణి భువనేశ్వరిని కించపరిచేలా వ్యాఖ్యలు చేశారని కన్నీటి పర్యంతమయ్యారు.మంగళగిరిలోని తెదేపా కార్యాలయంలో శుక్రవారం ఏర్పాటు చేసిన మీడియా సమావేశంలో వెక్కి వెక్కి ఏడ్చారు. తన భార్య వ్యక్తిత్వాన్ని కించపరిచేలా తీవ్రంగా అవమానించారంటూ... మాటలు తడబడుతూ ఉద్వేగాన్ని ఆపుకోలేకపోయారు. ఎలాంటి విపత్కర పరిస్థితులు ఎదురైనా చలించని చంద్రబాబు.... కష్టనష్టాల్లో తోడుగా నిలిచిన సతీమణిని అనరాని మాటలు అన్నారంటూ తీవ్రంగా ఆవేదన చెందారు. ఇలాంటి అవమానం తట్టుకోలేనంటూ వెక్కివెక్కి ఏడ్చారు. ఉబికివస్తున్న కన్నీటిని చేతి రుమాలుతో తుడుచుకునే ప్రయత్నం చేసినా.... అవమానభారంతో ఆయనకు ఉద్వేగం ఆగలేదు. అధినేత రోదించడాన్ని చూసి తెలుగుదేశం నేతలు నిశ్చేష్టులయ్యారు. ఎలాంటి పరిస్థితులనైనా మొక్కవోని ధైర్యంతో దీటుగా ఎదుర్కొనే చంద్రబాబు.... ఒక్కసారిగా ఏడవడంతో వాళ్లూ కంటతడి పెట్టారు.