Asian Games 2023 First Day Five Medals అదీ భారత్. ప్రతిష్టాత్మక ఆసియా క్రీడల్లో పతక వేటను అథ్లెట్లు ఘనంగా ప్రారంభించారు. మొదటి రోజు గోల్డ్ మెడల్ దక్కకపోయినా.. ఏకంగా ఐదు మెడల్స్ను ఖాతాలో వేసుకున్నారు. షూటర్లు, రోయర్లు సూపర్ పెర్ఫార్మెన్స్తో అదరగొట్టి ఈ క్రీడల్లో దేశానికి మంచి శుభారంభాన్ని అందించారు. షూటర్‌ రమిత రెండు మెడల్స్తో సత్తాచాటింది. మరోవైపు అమ్మాయిల క్రికెట్ జట్టు ఫైనల్స్కు అర్హత సాధించింది. చెస్‌, బాక్సింగ్‌, హాకీలోనూ మంచి రిజల్ట్ వచ్చాయి.
- ప్రస్తుతం జరుగుతున్న ఈ ఆసియా క్రీడల్లో దేశానికి తొలి మెడల్ రోయింగ్లోనే వచ్చింది. ఆదివారం లైట్‌ వెయిట్‌ పురుషుల డబుల్‌ స్కల్స్‌ విభాగంలో అర్జున్‌ లాల్‌ - అర్వింద్‌ సింగ్‌ సిల్వర్ మెడల్తో భారత్ ఖాతా తెరిచారు. దీంతో ఫైనల్ ఎలో భారత్ రెండో స్థానంలో నిలిచింది. అర్జున్‌- అర్వింద్‌ ద్వయం 6 నిమిషాల 28.18 సెకన్లలో రేసును ముగించారు.
- అనంతరం పురుషుల ఎయిట్‌ ఫైనల్ ఎలో భారత్కు మరో సిల్వర్ మెడల్ ముద్దాడింది. నరేశ్‌, నీరజ్‌, చరణ్‌జీత్‌, నీతిష్‌, భీమ్‌, జస్విందర్‌, ఆశిష్‌, పునీత్‌, ధనంజయ్‌తో కూడిన భారత జట్టు 5:43.01సె టైమింగ్‌తో రెండో స్థానాన్ని దక్కించుకుంది.
- రోయింగ్లోనే పురుషుల పెయిర్‌ ఫైనల్ ఎలో బాబులాల్‌ - రామ్‌ లేఖ్‌ జోడీ భారత్కు కాంస్యాన్ని అందించింది. ఈ జంట 6:50.41సెకన్లలో లక్ష్యాన్ని చేరుకుంది.
- రోయర్లు అందించిన ఉత్సాహాన్ని షూటర్లు కూడా కొనసాగించారు. మహిళల 10మీ. ఎయిర్‌ రైఫిల్‌ టీమ్‌ విభాగంలో రమిత, మెహులి, ఆశి భారత్కు సిల్వర్ మెడల్ అందించారు. క్వాలిఫికేషన్లో రమిత 631.9, మెహులి 630.8, ఆశి 623.3 స్కోరు చేశారు. దీంతో మొత్తం 1886 పాయింట్లతో భారత్ రెండో స్థానాన్ని అందుకుంది.
- ఆ తర్వాత వ్యక్తిగత విభాగంలోనూ రమిత మరో పతకాన్ని ముద్దాడింది. ఎనిమిది మంది షూటర్లు తలపడ్డ పైనల్లో జూనియర్‌ ప్రపంచ ఛాంపియన్‌ రమిత 230.1 పాయింట్లతో కంచు పతకాన్ని ముద్దాడింది.
- అలా రోయింగ్, షూటింగ్లో కలిపి భారత్కు తొలి రోజు మొత్తం ఐదు పతకాలు వచ్చాయి.
హాకీ.. ఇక ఈ ఆసియా క్రీడల్లో గోల్డ్ మెడల్పై కన్నేసిన పురుషుల హాకీ జట్టు పతక వేటను ఘనంగానే ప్రారంభించింది. పూల్‌- ఎ మ్యాచ్‌లో భారత్ 16-0 తేడాతో ఉజ్బెకిస్థాన్‌ను చిత్తుచిత్తుగా ఓడించింది. భారత్ తన తర్వాతి మ్యాచ్ను మంగళవారం సింగపూర్తో తలపడనుంది.
క్రికెట్... ఈ ఆసియా క్రీడల్లో మహిళల క్రికెట్లో భారత్ పసిడికి అడుగు దూరంలో ఉంది. ఆదివారం సెమీస్లో బంగ్లాదేశ్‌ను 8 వికెట్ల తేడాతో చిత్తుచేసి ఫైనల్కు చేరింది. మరో సెమీస్లో లంక 6 వికెట్ల తేడాతో పాకిస్థాన్ను ఓడించింది. దీంతో సోమవారం(సెప్టెంబర్ 25) భారత్.. శ్రీలంక మధ్య ఫైనల్ జరగనుంది.
చెస్‌లో కోనేరు హంపి, ద్రోణవల్లి హారిక శుభారంభం చేశారు. తొలి రెండు రౌండ్లలో వీళ్లిద్దరూ విజయాలు అందుకున్నారు. ఇంకా పలువురు ఆటగాళ్లు కూడా మంచిగానే రాణించారు.