Sreesanth vs Gambhir : టీమ్ఇండియ మాజీ ప్లేయర్లు గౌతమ్ గంభీర్ - శ్రీశాంత్ మధ్య తాజాగా చిన్నపాటి వాగ్వాదం జరిగింది. 2023 లెజెండ్స్ ప్రీమియర్ లీగ్లో భాగంగా ఇండియా క్యాపిటల్స్ - గుజరాత్ జెయింట్స్ మధ్య బుధవారం మ్యాచ్ జరిగింది. ఈ లీగ్లో ఇండియా క్యాపిటల్స్ జట్టుకు గంభీర్ కెప్టెన్ కాగా, శ్రీశాంత్ గుజరాత్కు ప్రాతినిధ్యం వహిస్తున్నాడు.
ఈ మ్యాచ్ రెండో ఓవర్లో శ్రీశాంత్ బౌలింగ్లో గంభీర్, వరుసగా సిక్స్, ఫోర్ కొట్టి ఊపుమీదున్నాడు. ఈ క్రమంలో శ్రీశాంత్, గంభీర్ వైపు అదోలా చూశాడు. దీంతో గంభీర్ ఏ మాత్రం తగ్గకుండా ఏంటి అన్నట్లుగా శ్రీశాంత్ను చూశాడు. దీంతో మైదానంలోనే ఇద్దరి మధ్య మాటల యుద్ధం మొదలైంది. ఇంతలో ఫీల్డ్ అంపైర్లు కలగజేసుకొని ఇద్దరికి నచ్చజెప్పారు.
అయితే తాజాగా శ్రీశాంత్, సోషల్ మీడియాలో ఓ వీడియో పోస్ట్ చేశాడు. గ్రౌండ్లో గంభీర్తో జరిగిన గొడవ గురించి ఈ వీడియోలో చెప్పాడు. "మైదానంలో గంభీర్ నన్ను 'ఫిక్సర్', 'ఫిక్సర్' అని అన్నాడు. నేను నవ్వుతూ ఏమన్నావ్? అని అడిగా అంతే. మళ్లీ తను అలాగే అన్నాడు. మధ్యలో వచ్చిన అంపైర్లతో కూడా పరుష పదజాలాన్ని ఉపయోగిస్తూ మాట్లాడాడు. నేను అతడిని ఒక్క మాట అనలేదు. చెడుగా ప్రవర్తించలేదు. అయితే అతడు 'సిక్సర్' అని అంటే నేను 'ఫిక్సర్' అని ప్రచారం చేస్తున్నానంటూ, అతడి మద్దతుదారులు అతడ్నికాపాడాలని చూస్తున్నారు. ఇది సరైన పద్దతి కాదు. ప్రజలు నిజాన్ని గమణించాలి" అని శ్రీశాంత్ అన్నాడు. ఇక గంభీర్ను తాను రెచ్చగొట్టకపోయినా, అతడే తనతో గొడవ పడ్డాడని అన్నాడు. అలాగే గంభీర్ సీనియర్లకు మర్యాద ఇవ్వడని బుధవారం మ్యాచ్ అనంతరం పోస్ట్ చేసిన వీడియోలో శ్రీశాంత్ చెప్పాడు.