IPL 2022 Qualifier 2 Match RR Vs RCB: ఐపీఎల్ 2022 సీజన్‌ ఆఖరి ఘట్టానికి చేరుకుంది. తొలి క్వాలిఫయర్‌లో రాజస్థాన్ రాయల్స్పై గుజరాత్ టైటాన్స్ గెలిచి ఫైనల్కు దూసుకెళ్లింది. ఇక, ఎలిమినేటర్ మ్యాచ్లో గెలిచి క్వాలిఫయర్- 2లో అడుగుపెట్టింది రాయల్ ఛాలెంజర్స్ బెంగళూరు. ఇక, డూ ఆర్ డై ఫైట్ క్వాలిఫయర్ -2మ్యాచ్లో రాజస్థాన్తో అమీతుమీ తేల్చుకోనుంది ఆర్సీబీ. ఈ మ్యాచ్లో గెలిచిన జట్టు నేరుగా ఫైనల్లో గుజరాత్తో తలపడనుంది. ఓడిన జట్టు ఇక లగేజీ సర్దుకోవడమే. ఈ నేపథ్యంలో రెండు జట్ల పరిస్థితి.. వంటి విషయాలకు సంబంధించిన పది పాయింట్లను ఓసారి పరిశీలిద్దాం.
- టీ20 లీగ్‌లో రాజస్థాన్, బెంగళూరు జట్ల మధ్య ఇప్పటివరకు 26 మ్యాచ్‌లు జరిగాయి. 13 మ్యాచ్‌ల్లో బెంగళూరు విజయం సాధించగా.. రాజస్థాన్ 11 మ్యాచ్‌ల్లో నెగ్గింది. మరో రెండింటిలో ఫలితం తేలలేదు. ఈ సీజన్‌లో రాజస్థాన్, బెంగళూరు రెండు సార్లు తలపడగా.. చెరో మ్యాచ్ గెలిచాయి.
- రాజస్థాన్ ప్రధాన బలం జోస్‌ బట్లర్‌. ఈ సీజన్‌లో రాజస్థాన్ ప్లే ఆఫ్స్‌ చేరడంలో అతడు కీలకపాత్ర పోషించాడు. బట్లర్‌ 15 మ్యాచ్‌ల్లో 718 పరుగులు చేసి అత్యధిక పరుగులు చేసిన ఆటగాడిగా కొనసాగుతున్నాడు. ఇందులో 3 సెంచరీలు, 4 అర్ధ సెంచరీలు ఉన్నాయి.
- రాజస్థాన్ బౌలింగ్‌ దళంలో యుజువేంద్ర చాహల్‌, ప్రసిద్ధ్‌ కృష్ణ కీలకం. ఈ సీజన్‌లో ఇప్పటివరకు 15 మ్యాచ్‌లు ఆడిన చాహల్‌ (26) వికెట్లతో అత్యధిక వికెట్లు పడగొట్టిన బౌలర్‌గా కొనసాగుతున్నాడు. ప్రసిద్ధ్‌ కృష్ణ 15 మ్యాచ్‌ల్లో 15 వికెట్లు పడగొట్టాడు.
- ఈ సీజన్‌లో లీగ్‌ దశలో 14 మ్యాచ్‌లు ఆడిన రాజస్థాన్ 9 మ్యాచ్‌ల్లో నెగ్గి ఐదింటిలో ఓడింది. క్వాలిఫయర్-1లో గుజరాత్ చేతిలో పరాజయం పాలైంది.
- ఈ సారి బెంగళూరుకు కాస్త అదృష్టం కలిసొచ్చింది. దిల్లీపై ముంబయి విజయం సాధించడంతో ఆ జట్టు ప్లే ఆఫ్స్‌కు చేరింది.
- లీగ్‌ దశలో 14 మ్యాచ్‌లు ఆడిన బెంగళూరు ఎనిమిది మ్యాచ్‌ల్లో గెలుపొందగా.. 6 మ్యాచ్‌ల్లో ఓటమిపాలైంది. ఎలిమినేటర్ మ్యాచ్లో లఖ్‌నవూపై విజయం సాధించి క్వాలిఫయర్-2కి అర్హత సాధించింది.
- బెంగళూరు బ్యాటింగ్‌లో కెప్టెన్‌ డుప్లెసిస్‌, విరాట్ కోహ్లీ, దినేశ్ కార్తీక్, మ్యాక్స్వెల్తో పాటు ఎలిమినేటర్ మ్యాచ్లో శతకం బాదిన రజత్‌ పాటిదార్‌ కీలకం కానున్నారు.
- బెంగళూరు బౌలింగ్‌లో వానిందు హసరంగ, హర్షల్‌ పటేల్ కీలకం. ఈ సీజన్‌లో ఇప్పటివరకు 15 మ్యాచ్‌లు ఆడిన హసరంగ 7.62 ఎకానమీతో 25 వికెట్లు పడగొట్టి అత్యధిక వికెట్లు తీసిన రెండో బౌలర్‌గా కొనసాగుతున్నాడు. హర్షల్‌ పటేల్ 14 మ్యాచ్‌ల్లో 7.56 ఎకానమీతో 19 వికెట్లు తీశాడు.
- రాజస్థాన్ ఆటగాడు జోస్‌ బట్లర్‌ను వీలైనంత తొందరగా పెవిలియన్‌ చేర్చితే బెంగళూరుకు విజయావకాశాలు మెరుగవుతాయి.
- మొత్తం మీద టైటిల్‌ పోరుకు అర్హత సాధించేందుకు జరిగే క్వాలిఫయర్-2 రసవత్తరంగా సాగే అవకాశం ఉంది. బలాబలాల పరంగా చూస్తే రాజస్థాన్‌కే కాస్త విజయావకాశాలు మెరుగ్గా కనబడుతున్నాయి. అయితే, ఎలిమినేటర్ మ్యాచ్‌లోలాగా బెంగళూరు సమష్టిగా రాణిస్తే రాజస్థాన్ ఓడించడం పెద్ద కష్టమేమీ కాదని చెప్పొచ్చు.