మతిపోగట్టే సొగసులు ఒకరిలోనే ఉంటే చూడటానికి రెండు కళ్లూ సరిపోవద్దూ? నిజమే కదా మరి! అందుకే అదే అందం, అదే నటన అక్కాచెల్లెళ్లుగా మారి వెండి తెరను జిగేల్‌మనిపిస్తున్నాయి. ఇలా వెండితెరపై అక్కా చెల్లెళ్లు సందడి చేయడం కొత్తమీ కాదు. కరీనా కపూర్ - కరిష్మా కపూర్, శిల్పాశెట్టి - శమితా శెట్టి, నగ్మ - జ్యోతిక తదితరులు చిత్రపరిశ్రమలో మెరిసినవాళ్లే. ఈ ట్రెండ్‌ను కొనసాగిస్తూ నవతరం నాయికలూ తమ చెల్లెళ్లను రంగంలోకి దించుతున్నారు.
డబుల్‌ ఫిదా.. సహజమైన అందంతో తెలుగు ప్రేక్షకులకు దగ్గరైన కథానాయిక సాయి పల్లవి. 'ప్రేమమ్‌' ద్వారా భాషతో సంబంధం లేకుండా యువతకు చేరువైన ఈ అందం 'లవ్‌ స్టోరీ', 'శ్యామ్‌ సింగరాయ్‌' చిత్రాల్లోని తన నటనతో 'ఫిదా' చేసింది. 'విరాట పర్వం'తో ఆకట్టుకుంటున్న సాయి పల్లవి చెల్లెలే పూజ కన్నన్‌. 2021లో తమిళంలో విడుదలైన 'సిత్తిరాయ్‌ సెవ్వానమ్‌' సినిమాతో వెండితెర కథానాయికగా మారింది. అంతకు ముందు 2017లోనే 'కారా' అనే లఘు చిత్రంతో మంచి పేరు తెచ్చుకుంది. ప్రస్తుతం కొన్ని ప్రాజెక్టులతో ప్రేక్షకుల ముందుకు రానుంది.
అతిలోక అందమై.. అతిలోక సుందరి శ్రీదేవి పెద్ద కుమార్తె జాన్వీ కపూర్ ఇప్పటికే తనదైన నటనతో మెప్పిస్తోంది. 2018లో ‘ధడక్‌’ చిత్రంతోనే విజయమందుకున్న ఈ ముద్దుగుమ్మ... ‘గుంజన్‌ సక్సేనా’ చిత్రంలో తనలోని నటిని పరిచయం చేసింది. ప్రస్తుతం ‘గుడ్‌ లక్‌ జెర్రీ’తో అందర్నీ అలరించడానికి సిద్ధంగా ఉంది. ఈ అమ్మడి చెల్లి ఖుషీ కపూర్ తెరంగ్రేటానికి ఇప్పటికే అడుగులు పడ్డాయి. జోయో అక్తర్‌ తెరకెక్కిస్తున్న ‘ఆర్చీస్‌’తో నెట్‌ఫ్లిక్స్‌ ద్వారా ప్రేక్షకులకు తన ప్రతిభ చూపించనుంది. ప్రస్తుతం చాలా కథలు వింటున్నామని తగిన చిత్రంతో ఖుషి త్వరలోనే థియేటర్లో సందడి చేయనుందని తండ్రి బోనీ కపూర్ ఇటీవలే మీడియో చెప్పారు.
శ్రుతికి అక్షర తోడు.. టాలీవుడ్‌ బ్యూటీ బాంబ్‌ శ్రుతీ హాసన్. 2000లో కమల్‌ హాసన్ నటించిన ‘హే రామ్‌’ చిత్రంతో శ్రుతి బాల నటిగా అడుగుపెట్టింది. సిద్ధార్థ్‌ సరసన నటించిన ‘అనగనగా ఓ ధీరుడు’, ‘ఓ మై ఫ్రెండ్‌’ చిత్రాలతో తనను తాను నిరూపించుకుంది. పవన్‌ కల్యాణ్‌ ‘గబ్బర్‌ సింగ్‌’తో తిరుగులేని స్టార్‌డమ్‌ సొంతం చేసుకుంది. తర్వాత వరసగా ‘బలుపు’, ‘ఎవడు’, ‘రేసు గుర్రం’, ‘శ్రీమంతుడు’ చిత్రాలతో కమర్షియల్‌ చిత్రాలకు విజయవంతమైన నటిగా పేరు తెచ్చుకుంది. ప్రేక్షకులకు రెట్టింపు ఆనందాన్ని ఇవ్వడానికన్నట్లు తన సోదరి అక్షర హాసన్ తెరంగేట్రం చేసింది. తమిళ చిత్రాలు ‘కడారమ్‌ కొండాన్‌’, ‘వివేగమ్‌’తో పాటు ‘దీవానా’, ‘లాలీ కీ షాదీ’ తదితర హిందీ చిత్రాల్లో నటించింది. ప్రస్తుతం నవీన్‌ దర్శకత్వంలో తెరకెక్కుతున్న ‘అగ్ని సిరగుగల్‌’ అనే చిత్రంలో విజయ్‌ ఆంథోని సరసన నటిస్తోంది.