కొన్ని సినిమాలకి పేర్లు ముందే ఖరారవుతుంటాయి. పేరుతోనే సినిమాని ప్రకటించే దర్శకులు కొద్దిమంది ఉంటారు. పూరి జగన్నాథ్‌ అందులో ఒకరు. విజయ్ దేవరకొండతో ఆయన తెరకెక్కిస్తున్న కొత్త సినిమాకి 'జనగణమన' అనే పేరుని ఖరారు చేశారు. కొబ్బరికాయ కొట్టినరోజే టైటిల్ లోగోని చూపించేశారాయన. కొన్ని సినిమాలేమో భిన్నంగా చిత్రీకరణ దశలో కానీ పేరు పక్కా చేసుకోవు. అలాంటి వాటికి బోలెడన్ని పేర్లు ప్రచారంలోకి వస్తుంటాయి. పేరు గురించి చర్చని లేవనెత్తు తుంటాయి. ఇప్పుడూ అదే జరుగుతోంది. సెట్స్‌పై ఉన్న ఒకొక్క సినిమాకి రెండు మూడు పేర్లు వినిపిస్తున్నాయి.
దేనికి జై కొడతారో?..బాలకృష్ణ కథానాయకుడిగా గోపీచంద్‌ మలినేని దర్శకత్వంలో ఓ చిత్రం తెరకెక్కుతోంది. మైత్రీ మూవీ మేకర్స్‌ నిర్మిస్తోంది. శ్రుతిహాసన్‌ కథానాయిక. బాలకృష్ణ ద్విపాత్రాభినయం చేస్తున్న ఈ సినిమా టీజర్‌ ఇటీవలే విడుదల చేశారు. పేరు ఖరారు కాలేదు. అయితే ప్రచారంలో మూడు టైటిళ్లు ఉన్నాయి. 'జై బాలయ్య', 'జై సింహారెడ్డి', 'అన్నగారు' అనే పేర్లు వినిపించాయి. మరి చిత్రబృందం దేనికి జై కొడుతుందో! ఇందులో బాలకృష్ణ ఓ పాత్రలో జై అనే పేరుతో కనిపిస్తారని సమాచారం. మహేష్‌బాబు కథానాయకుడిగా త్రివిక్రమ్‌ దర్శకత్వంలో తెరకెక్కుతున్న సినిమా జులైలోనే షురూ కానుంది. ఈ సినిమా పేరు గురించి అప్పుడే చర్చ మొదలైంది. త్రివిక్రమ్‌ సినిమాల పేర్లు ఎక్కువగా ‘అ’ అక్షరంతోనే మొదలవుతుంటాయి. ఈసారి ఆయన అదే సెంటిమెంట్‌ని అనుసరించే అవకాశాలున్నాయనేది ఫిల్మ్‌నగర్‌ వర్గాల మాట.