Nana Patekar Slaps His Fan :తన విలక్షణ నటనతో బాలీవుడ్‌లో మంచి పేరు సంపాదించుకున్నారు సీనియర్ నటుడు నానా పటేకర్. ఇటీవల 'ది వ్యాక్సిన్‌ వార్‌'తో ప్రేక్షకులను అలరించిన ఆయన తాజాగా ఓ వివాదంలో చిక్కుకున్నారు. సెల్ఫీ తీసుకునేందుకు ముందుకు వచ్చిన ఓ యువకుడిపై ఆయన చెయ్యి చేసుకున్నారు. దీంతో ఆయన ప్రవర్తన అంతటా చర్చనీయాంశంగా మారింది. ఇంతకీ అసలేం జరిగిందంటే?
Nana Patekar Viral Video :'జర్నీ' సినిమా షూట్‌లో భాగంగా ప్రస్తుతం వారణాసిలో పర్యటిస్తున్నారు నానా పటేకర్. వారణాసి వీధుల్లో షూటింగ్‌ జరుగుతోన్న సమయంలో అక్కడి వారందరూ ఆయన్ను చూసేందుకు ఆసక్తి కనబరిచారు. ఇదిలా ఉండగా.. ఆయన దగ్గరకు వెళ్లిన ఓ యువకుడు సెల్ఫీ తీసుకునేందుకు ప్రయత్నించాడు. యువకుడి తీరుతో అసహనానికి గురై అతడి తలపై ఆయన గట్టిగా కొట్టారు. దీనికి సంబంధించిన ఓ వీడియో సోషల్ మీడియాలో వైరల్గా మారింది. అంతేగాక సినిమా యూనిట్లోని ఓ వ్యక్తి.. సదరు అభిమాని కాలర్ పట్టుకుని అందరూ చూస్తుండగానే బయటకు తీసుకెళ్తున్నట్లు వీడియోలో ఉంది.