అక్రమ బంగారం సరఫరాకు(Gold smuggling in hyderabad airport) శంషాబాద్ విమానాశ్రయం అడ్డాగా మారుతోంది. అధికారులు ఎన్ని చర్యలు చేపట్టినా రాష్ట్రంలోకి బంగారం అక్రమ రవాణా ఆగడం లేదు. తాజాగా శంషాబాద్ ఇంటర్నేషనల్ ఎయిర్పోర్టులో లక్షల రూపాయలు విలువ చేసే బంగారం పట్టుబడింది. ఓ ప్రయాణికుడి నుంచి రూ.34లక్షలు విలువచేసే బంగారాన్ని కస్టమ్స్ అధికారులు సీజ్ చేశారు. దుబాయ్ నుంచి హైదరాబాద్కు ఈ బంగారాన్ని తరలిస్తుండగా సీజ్ చేశామని అధికారులు తెలిపారు.
జ్యూసర్ కడ్డీల రూపంలో..
ఎయిర్పోర్టులో ప్రయాణికుడిపై అనుమానం వచ్చిన కస్టమ్స్ అధికారులు తనిఖీలు చేశారు. ఈ తనిఖీల్లో... బంగారాన్ని అక్రమంగా తరలిస్తున్నట్లు అధికారులు గుర్తించారు. జ్యూసర్‌లో కడ్డీల రూపంలో బంగారాన్ని అమర్చి.. తీసుకెళ్లడానికి యత్నించాడని అధికారులు తెలిపారు. ఈ మేరకు అతడిని అదుపులోకి తీసుకున్నట్లు వెల్లడించారు.
రైల్లో కూడా అక్రమంగా..
ఇప్పటి వరకు విమానాశ్రయాల్లోనే ఎక్కువగా అక్రమ బంగారం పట్టుబడుతోంది. కానీ, స్మగ్లర్లు రైళ్లలో కూడా బంగారం తరలిస్తున్నారు. రైల్లో అక్రమంగా బంగారాన్ని తరలిస్తున్న ఓ వ్యక్తిని డైరెక్టరేట్ ఆఫ్ రివెన్యూ ఇంటెలిజెన్స్(డీఆర్ఐ) అధికారులు ఇటీవలె పట్టుకున్నారు. యశ్వంత్‌పుర్‌- హౌరా ఎక్స్‌ప్రెస్‌(Yeshwantpur- Howrah Express)లో బంగారాన్ని తరలిస్తున్నాడన్న పక్కా సమాచారంతో.. ఏపీలోని విశాఖ రైల్వే స్టేషన్లో బుధవారం మధ్యాహ్నం అధికారులు మాటువేశారు. రైలు రాగానే.. అందులోకి ప్రవేశించి.. నిందితుడిని తనిఖీ చేశారు. అతడి వద్ద ఏకంగా.. రూ.1.91 కోట్లు విలువ చేసే 3.89 కిలోల బంగారం బయటపడింది. నిందితుడు కోల్‌కతా నుంచి ప్రయాణిస్తున్నట్లు పోలీసులు తెలిపారు. పట్టుబడిన బంగారాన్ని బంగ్లాదేశ్ నుంచి తీసుకువచ్చి.. కోల్కతాలో వివిధ రకాల ఆభరణాలుగా తయారు చేసినట్లు ప్రాథమిక దర్యాప్తులో వెల్లడైందని అధికారులు చెప్పారు. నిందితుడిని జ్యూడిషియల్ కస్టడీకి తరలించినట్లు డీఆర్ఐ(DRI) అధికారులు తెలిపారు.