Farmers Suicide due to crop loss : అప్పుల బాధతో మరో ఇద్దరు రైతులు ఆత్మహత్యకు పాల్పడ్డారు. లక్షల రూపాయలు పెట్టుబడి పెట్టి సాగు చేస్తే... నష్టాలే మిగిలాయి. ఓవైపు మిరప చేనుపై తామర పురుగు... మరోవైపు వడగండ్ల వానలతో అన్నదాత ఆశలు అడియాసలయ్యాయి. మనస్తాపం చెందిన ఇద్దరు రైతులు వేర్వేరుగా పురుగుల మందు తాగి బలవన్మరణం చెందారు.
ఏం జరిగింది?
మహబూబాబాద్ జిల్లా కేసముద్రం మండలం బేరువాడలో విషాదం చోటుచేసుకుంది. అప్పుల బాధతో రైతు భాస్కర్.. పురుగుల మందు తాగి ఆత్మహత్య చేసుకున్నారు. తనకున్న ఎకరం భూమితోపాటు మరో ఎకరం కౌలు తీసుకుని మిర్చి సాగు చేశారు. రెండు లక్షల రూపాయలు అప్పు ఉండగా... మరో రూ.లక్షా 50 వేలు అప్పు తెచ్చి పెట్టుబడి పెట్టారు.
రుణం తీర్చలేక..
తామర పురుగుతో మిర్చి దెబ్బతినగా, అకాల వర్షాల వల్ల పూర్తిగా నష్టపోయారు. రుణం తీర్చలేనని మనోవేదనకు గురై ఈ నెల 14న రాత్రి పురుగుల మందు తాగి ఆత్మహత్యాయత్నం చేసుకున్నారు. ఆస్పత్రిలో చికిత్స పొందుతూ మృతి చెందారు. మృతునికి భార్య, ఇద్దరు పిల్లలు ఉన్నారు.
వడగండ్ల వాన తెచ్చిన నష్టం
వడగండ్ల వాన కురిసి... పంట దెబ్బతినడంతో మరో రైతు ఆత్మహత్య చేసుకున్నారు. జయశంకర్ భూపాలపల్లి జిల్లా మహాముత్తారం మండలం రెడ్డిపల్లికి చెందిన సుగులం అనంతరామ్ బలవన్మరణం చెందారు. ఆయన రెండు ఎకరాల్లో మిరప, నాలుగు ఎకరాల్లో పత్తి పంటను సాగు చేశారు. ఇటీవలి వడగండ్ల వర్షాలకు దెబ్బతినడంతో తీవ్ర మనస్తాపం చెంది... సోమవారం రాత్రి పురుగుల మందు తాగారు. ఇది గమనించిన కుటుంబసభ్యులు ఆస్పత్రికి తరలిస్తుండగా మృతి చెందారు. ఈ మేరకు మృతుడి భార్య సావిత్రి పోలీసులకు మంగళవారం ఫిర్యాదు చేశారు.
ఇదీ చదవండి:Toll plazas sankranthi revenue 2022 : కాసులు కురిపించిన సంక్రాంతి.. టోల్‌ప్లాజాలకు దండిగా ఆదాయం
