మహిళకు (Model hair cutting) తప్పుడు క్షవరం (హెయిర్కట్) సహా ఆమె కేశాలకు వేరే చికిత్స చేసినందుకు రూ.2 కోట్లు పరిహారంగా చెల్లించాలంటూ దిల్లీలోని విలాసవంతమైన హోటల్‌కు (NCDRC Haircut) జాతీయ వినియోగదారుల వివాదాల పరిష్కార కమిషన్ (ఎన్‌సీడీఆర్‌సీ) ఆదేశాలు జారీచేసింది. మోడలింగ్‌లో అత్యున్నత శిఖరాలు అధిరోహించాలన్న ఆమె కల హోటల్ సిబ్బంది పొరపాటు కారణంగా సర్వనాశనం అయిందని వ్యాఖ్యానించింది.
ఈ మేరకు ఎన్‌సీడీఆర్‌సీ అధ్యక్షుడు ఆర్‌.కె అగర్వాల్‌, సభ్యుడు ఎస్‌ఎం కాంతికార్‌ ఆదేశాలు జారీచేశారు. మహిళలకు కేశ సంపదతో (Model hair cutting) భావోద్వేగపరమైన అనుబంధం ఉంటుందని, వాటిని సంరక్షించుకునేందుకు, మంచి స్థితిలో ఉంచుకునేందుకు అనేక జాగ్రత్తలు తీసుకోవడం సహా శక్తి కొద్దీ ఖర్చు చేస్తారని వ్యాఖ్యానించారు.
కల చెదిరింది..
ఫిర్యాదుదారైన అషనా రాయ్‌ (Ashna Roy Haircut) తనకున్న పొడవైన కేశాల కారణంగా పలు కేశసంరక్షణ ఉత్పత్తులకు మోడల్‌గా వ్యవహరించారని, అనేక పెద్ద బ్రాండ్‌లకు పనిచేశారని కమిషన్ పేర్కొంది. "సూచనలకు విరుద్ధంగా క్షవరం (Wrong Haircut) చేయడం వల్ల ఆమె అవకాశాలు దూరమయ్యాయి. ఆమె జీవితమే మారిపోయింది. అత్యున్నత మోడల్ కావాలన్న అషనా కల నాశనమైంది." అని ఈ నెల 21న జారీ చేసిన ఉత్తర్వులో కమిషన్ స్పష్టంచేసింది.
ఉద్యోగం పోగొట్టుకుంది..
అషనా (Ashna Roy Haircut).. సీనియర్ మేనేజ్మెంట్ ఫ్రొఫెషనల్గా పనిచేస్తూ మంచి జీతం ఆర్జిస్తోందని కమిషన్ తెలిపింది. సెలూన్ సిబ్బంది నిర్లక్ష్యం కారణంగా ఆమె కుంగుబాటుకు లోనైందని, ఎంతో వేదన అనుభవించిందని చెప్పింది. దీంతో ఉద్యోగం సరిగ్గా చేయలేకపోవడం వల్ల ఉపాధి కోల్పోవాల్సి వచ్చిందని వెల్లడించింది.
సిబ్బంది పొరపాటు కారణంగా ఆమె నెత్తికాలిపోయిందని, ఇప్పటికీ దురద, అలెర్టీతో బాధపడుతున్నారని కమిషన్ వ్యాఖ్యానించింది. ఫిర్యాదుదారు వాట్సప్‌ చాట్‌ను పరిశీలించగా.. హోటల్ యాజమాన్యం తన తప్పును అంగీకరించడం సహా దిద్దుబాటు చర్యలు చేపట్టడానికి ఒప్పుకుందని ఎన్‌సీడీఆర్‌సీ (NCDRC Haircut) చెప్పింది.
ఇదీ చూడండి:ఆమె జుట్టే డ్రెస్- నెటిజన్లు షాక్
