ETV Bharat / videos

Instagram Influencer DMart Chocolate Video Arrest :   ఈ రోజుల్లో ఏ చిన్న పని చేసినా, దానిని సెల్​ఫోన్లలో బంధించడం చాలా మందికి ఉన్న అలవాటు. నలుగురిలో కాస్త పాపులర్ కావడానికి ఆ వీడియోలతో రీల్స్ గట్రా చేస్తూ నచ్చితే లైకులు, బాగుంటే షేర్​లు చేయండంటూ వాళ్ల ప్రయత్నాలేవో వాళ్లు చేస్తుంటారు. ఇలాంటివి కొన్నిసార్లు వర్కౌట్​ అయ్యి, రాత్రికి రాత్రి సోషల్​ మీడియా స్టార్స్​గా మారిన వారున్నారు. అదే సమయంలో చిక్కుల్లో పడ్డవారూ లేకపోలేదు. ఇప్పుడు అలాంటి పరిస్థితే ఆ యువకులకు ఎదురైంది.

వివరాల్లోకి వెళితే హైదరాబాద్​లోని షేక్‌పేట ప్రధాన రహదారిపై ఉన్న డీమార్ట్‌లోకి ఇటీవల హనుమంత్ నాయక్‌ అనే యువకుడు తన స్నేహితులతో కలిసి వెళ్లాడు. అందులో అమ్మకానికి ఉంచిన కొన్ని చాక్లెట్లను తీసుకుని ట్రయల్​ రూమ్​లోకి వెళ్లి తింటూ వీడియో తీసుకున్నాడు. ఆపై డీమార్ట్​లో బిల్లు చెల్లించకుండా చాక్లెట్లు ఎలా తినాలో తెలుసా అంటూ ఇన్​స్టాగ్రామ్​లో రీల్స్​ చేసి దానిని సోషల్ మీడియాలో పోస్ట్​ చేశాడు.  

అది కాస్తా వైరల్​ అయి, డీమార్ట్​ షేక్​పేట బ్రాంచ్ మేనేజర్ దృష్టికి రావడంతో ఆయన ఫిలింనగర్​ పోలీసులను ఆశ్రయించారు. ఫిర్యాదు స్వీకరించిన పోలీసులు చాక్లెట్లను తస్కరించిన హనుమంత్‌ నాయక్‌తో పాటు అతడికి సహకరించిన స్నేహితులపై ఐపీసీ 420, 379 సెక్షన్లతో పాటు ఐటీ యాక్ట్‌ కింద కేసు నమోదు చేసి దర్యాప్తు చేపట్టారు.