ନୟାଗଡ଼: କମୁଛି ମହାନଦୀ ଜଳସ୍ତର, ବଢୁଛି ଚାଷୀଙ୍କ ଦୁର୍ଦ୍ଦଶା । ମହାନଦୀକୁ ପ୍ରାଣକେନ୍ଦ୍ର କରି ଯେଉଁ ଚାଷୀ ଜୀବିକା କରିଥିଲା ଆଜି ସେ ଦାଦନ ମୁହାଁ ହୋଇଛି । ଛତିଶଗଡ ସରକାର ମହାନଦୀ ଉପର ମୁଣ୍ଡରେ ବ୍ୟାରେଜ ନିର୍ମାଣ କରିବା ଫଳରେ ଏହାର ପ୍ରଭାବ ମହାନଦୀ ଉପରେ ପଡିଛି । ଓଡିଶାର ଜୀବନରେଖା କୁହାଯାଉଥିବା ମହାନଦୀ ଶୁଖି ଯିବାକୁ ବସିଥିବା ବେଳେ ହଜାର ହଜାର ଚାଷୀ ଏବଂ ମତ୍ସ୍ୟଜୀବୀ ଏବେ କୁଳ ବେଉସା ହରାଇ ଅନ୍ୟ କାମରେ ନିୟୋଜିତ ହୋଇଛନ୍ତି । ମହାନଦୀର ଅକାତକାତ ପାଣିକୁ ଉତ୍ସ କରି ନଦୀ କୂଳ ଅଞ୍ଚଳରେ ପନିପରିବା ଚାଷ ହେଉଥିଲା କିନ୍ତୁ ବର୍ତ୍ତମାନ ଜଳସ୍ତର ହ୍ରାସ ଯୋଗୁଁ ପାଣି ଆଣି ଚାଷ କରିବା ଏବେ ସମ୍ଭବ ହେଉନାହିଁ।
ସେହିପରି ଉପକୂଳବର୍ତ୍ତୀ ଗ୍ରାମଗୁଡିକରେ ଥିବା ମତ୍ସ୍ୟଜୀବୀମାନଙ୍କ ଜୀବିକା ଗଭୀର ଭାବେ ପ୍ରଭାବିତ ହୋଇଛି । ସେମାନେ ଦୈନିକ ମହାନଦୀରୁ ମାଛଧରି ବ୍ୟବସାୟ କରି ପରିବାର ପ୍ରତିପୋଷଣ କରୁଥିଲେ । ବର୍ତ୍ତମାନ ବେଉସା ଚାଲିଯିବା ପରେ ସେମାନଙ୍କ ପରିବାର ଆର୍ଥିକ ଅନଟନ ମଧ୍ୟରେ ଗତି କରୁଛନ୍ତି । ମାଛ ଧରା ଛାଡି ଦାଦନ ମୁହାଁ ହୋଇଛନ୍ତି । ଏହା ସହ ସ୍ଥାନୀୟ ମାଛ ବଜାରରେ ମହାନଦୀର ମାଛ ସ୍ବପ୍ନ ପାଲଟିଗଲାଣି ।
ଚିରସ୍ରୋତା ମହାନଦୀର ଯେଉଁ ସ୍ଥାନରେ ପାଣି କାତ ପାଉ ନଥିଲା ସେଠି ଏବେ ବାଲିର ପାହାଡ ସୃଷ୍ଟି ହୋଇଛି । ଏହାଛଡା ମହାନଦୀ ଅବବାହିକାରେ ଦ୍ରୁତ ଜଙ୍ଗଲ କ୍ଷୟ ଯୋଗୁ ନଦୀ ଗର୍ଭ କ୍ରମେ ପୋତି ହୋଇଯାଉଛି । ନୟାଗଡ଼ ଜିଲ୍ଲାର ସିଧାମୂଳା, ବଡବାଣପୁର, କଣ୍ଟିଲୋ, ପଦ୍ମାବତୀ, କରବର ଆଦି ପଞ୍ଚାୟତଗୁଡିକ ଗଭୀର ଭାବେ ପ୍ରଭାବିତ ହୋଇଛି । ମହାନଦୀ ଜଳକୁ ଆଧାର କରି ଗଢିଉଠିଥିବା ପାନୀୟ ଜଳ ସେଚନ ପ୍ରକଳ୍ପଗୁଡିକ ଏବେ ବନ୍ଦ ହୋଇପଡିଛି । ମେଗା ଜଳସେଚନ ପ୍ରକଳ୍ପ ଗୁଡିକ ସମ୍ପୂର୍ଣ୍ଣ ଅଚଳ ହୋଇପଡିବା ସହ ଲକ୍ଷ ଲକ୍ଷ ଟଙ୍କାର ଯନ୍ତ୍ରାଂଶ ଖତ ଖାଉଛି ।