ଭୁବନେଶ୍ବର: ଦୁଇ ଦିନ ହଙ୍ଗମା ପରେ ତୃତୀୟ ଦିନ ଗୃହ କାର୍ଯ୍ୟ ସ୍ବାଭାବିକ ହୋଇଛି । ବିଧାନସଭାରେ ପ୍ରଶ୍ନକାଳ ସ୍ବାଭାବିକ ଭାବେ ଚାଲିଛି । ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କୁ ପ୍ରଶ୍ନ ପଚାରିବାକୁ ସୁଯୋଗ ନ ମିଳିବାରୁ ସେ କକ୍ଷ ତ୍ୟାଗ କରିଛନ୍ତି । ବାଚସ୍ପତି ପକ୍ଷପାତ କରୁଥିବା କହିଛନ୍ତି ବିଧାୟକ ପ୍ରଦୀପ ପାଣିଗ୍ରାହୀ ।
ବିଧାନସଭା ଅଧିବେଶନ ପ୍ରଶ୍ନକାଳରେ ବିଧାୟକ ପ୍ରଦୀପ ପାଣୀଗ୍ରାହୀ ପ୍ରଶ୍ନ କରିବାକୁ ଯିବା ସମୟରେ ତାଙ୍କୁ ବାଚସ୍ପତି ଅଟକାଇ ଥିଲେ । ପ୍ରଶ୍ନ ପଚାରିବାକୁ ସୁଯୋଗ ଦେଇ ନଥିଲେ ତେଣୁ ସେ କକ୍ଷତ୍ୟାଗ କରିଛନ୍ତି । ଏ ବାବଦରେ ବିଧାୟକ କହିଛନ୍ତି, ''ବାଚସ୍ପତି ପକ୍ଷପାତ କରୁଛନ୍ତି । ଗୋପାଳପୁରର ବିକାଶ ଚାହୁଁ ନାହାନ୍ତି ସରକାର । ବିଧାନସଭାରେ ପ୍ରଶ୍ନ କରିବାକୁ ଚାହିଁଲି ମାତ୍ର ବଚସ୍ପତି ମୋତେ ସୁଯୋଗ ଦେଲେ ନାହିଁ ।'' ସମସ୍ତଙ୍କୁ ସୁଯୋଗ ଦିଆଗଲା ମାତ୍ର ପ୍ରଦୀପଙ୍କୁ କାହିଁକି ସୁଯୋଗ ଦିଆଗଲା ନାହିଁ ପ୍ରଶ୍ନର ଉତ୍ତରରେ ସେ କହିଛନ୍ତି, ଏହା ବାଚସ୍ପତି ଓ ସରକାରଙ୍କୁ ପଚାର । ଗୃହରେ ସଦସ୍ୟଙ୍କୁ କହିବାକୁ ସୁଯୋଗ ଦିଆ ନଯିବା ଗୃହର ଅପମାନ ବୋଲି କହିଛନ୍ତି ବିଧାୟକ ପ୍ରଦୀପ ପାଣିଗ୍ରାହୀ ।
ପ୍ରଶ୍ନକାଳରେ ଏମଏଲଏ ଲାଡ ଫଣ୍ଡ ବିଷୟ ଉଠିଥିଲା । ବାଚସ୍ପତି ଓ ମୁଖ୍ୟମନ୍ତ୍ରୀ ଗଞ୍ଜାମ ଜିଲ୍ଲାରେ ଏମଏଲଏ ଲାଡ ଫଣ୍ଡ କାର୍ଯ୍ୟକାରୀ କରିବାକୁ ଚାହୁଁ ନଥିବା ମୁଁ ଭାବୁଛି ବୋଲି କହିଛନ୍ତି ବିଧାୟକ ପ୍ରଦୀପ ପାଣିଗ୍ରାହୀ । ସେହିପରି ମନ୍ଦିର, ମସଜିଦ, ଗିର୍ଜା ଘର ପାଚେରୀ ନିର୍ମାଣରେ ଏଇ ଅର୍ଥ ଖର୍ଚ୍ଚ ହୋଇପାରିବ। କିନ୍ତୁ ନୂଆ ନିର୍ମାଣରେ ହୋଇପାରିବ ନାହିଁ । ରଘୁନାଥ ଗମାଙ୍ଗଙ୍କ ପ୍ରଶ୍ନର ଉତ୍ତର ରଖିଥିଲେ ରାଜେନ୍ଦ୍ର ଢୋଲକିଆ । ଏହା ପରେ ଆରମ୍ଭ ହୋଇଥିଲା ଶୂନ୍ୟକାଳ ।