କେନ୍ଦ୍ରାପଡ଼ା:ଶେଷ ହୋଇଥିଲା ବିବାହର ସମସ୍ତ ପ୍ରସ୍ତୁତି । ଘର ଆଗରେ ଟେଣ୍ଟ ଟଣାଯିବା ସହ ବେଦୀ ବନ୍ଧା ହୋଇଥିଲା । ଭୋଜି ଭାତ ପାଇଁ ମଧ୍ୟ ସମସ୍ତ ପ୍ରସ୍ତୁତି ସରିଥିଲା । ବିବାହ ପାଇଁ ପ୍ରାପ୍ତ ବୟସ ହୋଇନଥିବା ପୁଅ ଆଉ ଝିଅ ସାଜିଥିଲେ ବରକନ୍ୟା । କିଛି ସମୟ ପରେ ପଡ଼ିଥାନ୍ତା ହାତଗଣ୍ଠି । ହେଲେ ଏହା ପୂର୍ବରୁ ଘଟଣାସ୍ଥଳରେ ପହଞ୍ଚିଲା ଶିଶୁ ସୁରକ୍ଷା ବିଭାଗ । ଏଭଳି ଏକ ଘଟଣା ଘଟିଛି କେନ୍ଦ୍ରାପଡ଼ା ଜିଲ୍ଲା ବାଲିଚନ୍ଦ୍ରପୁର ଥାନା ଅଧିନ କୃଷ୍ଣଦାସପୁର ଅଞ୍ଚଳରେ ।
ଆଇନ ଭାଙ୍ଗି ଆଇନର ଜାଲରେ ଛନ୍ଦି ହୋଇଗଲେ ନାବାଳକ ବର ଓ ତାଙ୍କ ପରିବାର ଲୋକେ । ଏହି ଅଞ୍ଚଳରେ ନାବାଳିକା ବିବାହ ସୂଚନା ପାଇବା ମାତ୍ରେ ଶିଶୁ ସୁରକ୍ଷା ବିଭାଗ ଘଟଣାସ୍ଥଳରେ ପହଞ୍ଚି ବିବାହ ବନ୍ଦ କରିଥିଲା । କୌଣସି ସୂତ୍ରରୁ ଖବର ପାଇ ଶିଶୁ ମଙ୍ଗଳ ବିଭାଗର ଅଧିକାରୀ ପହଞ୍ଚି ନାବାଳିକାଙ୍କୁ ଉଦ୍ଧାର କରିଛନ୍ତି । ଡେରାବିଶ ବ୍ଲକ ଚାନ୍ଦୋଳ ଫାଣ୍ଡି ଅନ୍ତର୍ଗତ ଭଣଗାଁ ବାଙ୍କୀମୁଣ୍ଡାଇ ଗ୍ରାମର ଧ୍ରୁବ ମଲ୍ଲିକଙ୍କ କୋଡିଏ ବର୍ଷୀୟ ପୁଅ ଭାବଗ୍ରାହୀ ମଲ୍ଲିକ କିଛି ଦିନ ତଳେ ବାଲିଚନ୍ଦ୍ରପୁର ଥାନା ଅଧିନ କୃଷ୍ଣଦାସପୁର ଅଞ୍ଚଳର ଜଣେ ନାବାଳିକାକୁ ଭଲ ପାଇ ଘରୁ ନେଇ ଫେରାର ହୋଇ ଯାଇଥିଲେ ।
ତେବେ ଦୁଇ ପରିବାରର ସମ୍ମତି କ୍ରମେ ସେମାନଙ୍କ ବିବାହ ହେଉଥିଲା । ଏତିକି ବେଳେ ଜିଲ୍ଲା ଶିଶୁ ମଙ୍ଗଳ ଅଧିକାରୀ ଓ ସମାଜ ମଙ୍ଗଳ ଅଧିକାରୀ ଖବରପାଇ, ଡେରାବିଶ ସିଡିପିଓ ଓ ସ୍ଥାନୀୟ ଅଙ୍ଗନବାଡି କର୍ମୀଙ୍କୁ ନେଇ ସେଠାରେ ପହଞ୍ଚିବାକୁ ନିର୍ଦ୍ଦେଶ ଦେଇଥିଲେ । ସିଡିପିଓ ଓ ଅଙ୍ଗନବାଡିକର୍ମୀ ଚାନ୍ଦୋଳ ଫାଣ୍ଡି ପୋଲିସଙ୍କୁ ନେଇ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ ।