ଝାରସୁଗୁଡ଼ା:ବହୁ ଚର୍ଚ୍ଚିତ ନବ ଦାସ ହତ୍ୟାକାଣ୍ଡ ମାମଲା । ଅଭିଯୁକ୍ତ ଗୋପାଳ ଦାସ ବିରୁଦ୍ଧରେ ସାକ୍ଷ୍ୟ ଗ୍ରହଣ ହୋଇଛି । କେମିତି ଗୋପାଳ ଦାସ ପୂର୍ବତନ ସ୍ବାସ୍ଥ୍ୟମନ୍ତ୍ରୀ ନବ ଦାସଙ୍କୁ ଗୁଳି କରିଥିଲା । ସେନେଇ ଆଜି କୋର୍ଟରେ ପ୍ରତ୍ୟକ୍ଷଦର୍ଶୀଙ୍କ ବୟାନ ରେକର୍ଡ ହୋଇଛି । ପୂର୍ବରୁ କ୍ରାଇମବ୍ରାଞ୍ଚ ତା'ର ଚାର୍ଜସିଟ୍ ଏବଂ ସମସ୍ତ ରିପୋର୍ଟ ଦାଖଲ କରିଥିଲା । ଗୋପାଳକୁ ରିମାଣ୍ଡରେ ନେଇଥିବା ସମସ୍ତ ଅଧିକାରୀମାନଙ୍କ ଷ୍ଟେଟମେଣ୍ଟ ଅଦାଲତରେ ହସ୍ତାନ୍ତର କରାଯାଇଥିଲା । ଗୋପାଳ ଦାସ ପୀଡିତ ଥିବା ବାଇପୋଲାର ଡିଜିଜ୍ ରିପୋର୍ଟ ମଧ୍ୟ ଡିଫେନ୍ସ କାଉନସିଲ ଦାଖଲ କରିଥିଲେ । ଏହା ସହିତ ଏହି ହାଇପ୍ରୋଫାଇଲ ହତ୍ୟାକାଣ୍ଡର ଶତାଧିକ ସାକ୍ଷୀ ରହିଥିବା ଜଣାପଡିଛି ।
ଝାରସୁଗୁଡା ଜିଲା କୋର୍ଟରେ ନବ ଦାସ ହତ୍ୟା ମାମଲାର ପ୍ରତ୍ୟକ୍ଷଦର୍ଶୀଙ୍କ ସାକ୍ଷ୍ୟ ଗ୍ରହଣ କରାଯାଇଛି । ସୂଚନାନୁସାରେ ଆଜି ବ୍ରଜରାଜନଗରର ଚନ୍ଦନ ସିଂଙ୍କୁ ସାକ୍ଷ୍ୟ ଗ୍ରହଣ ପାଇଁ କୋର୍ଟକୁ ଡ଼କାଯାଇଥିଲା । ଅଦାଲତ ସମ୍ମୁଖରେ ଚନ୍ଦନ ସିଂ ନିଜ ବୟାନ ଦେଇଥିଲେ । ଗତ ଜାନୁଆରୀ ୨୯ ତାରିଖରେ ପୂର୍ବତନ ସ୍ବାସ୍ଥ୍ୟମନ୍ତ୍ରୀ ନବ ଦାସଙ୍କୁ ପୋଲିସ ASI ଗୋପାଳ ଦାସ ଗୁଳି କରି ହତ୍ୟା କରିଥିଲେ। ଏନେଇ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ASI ଗୋପାଳ ଦାସଙ୍କ ବିରୁଦ୍ଧରେ ସାକ୍ଷ୍ୟ ଗ୍ରହଣ କରାଯାଇଥିଲା।
ଏନେଇ ଡିଫେନ୍ସ କାଉନ୍ସିଲ ନରେଶ ନାଏକ କହିଛନ୍ତି, "ପୂର୍ବରୁ ମଧ୍ୟ ସ୍ଵର୍ଗତ ନବ ଦାସଙ୍କ PA ଓ ତାଙ୍କ ବଡ଼ଭାଇଙ୍କ ସାକ୍ଷ୍ୟ ଗ୍ରହଣ କରାଯାଇଥିଲା । ଏହି ଘଟଣାରେ ଅନ୍ୟ ପ୍ରତ୍ୟକ୍ଷଦର୍ଶୀ ଓ ଘଟଣାସ୍ଥଳରେ ଥିବା ବ୍ୟକ୍ତଙ୍କ ମଧ୍ୟ ସାକ୍ଷ୍ୟ ଗ୍ରହଣ କରାଯିବ । ଏହି ହତ୍ୟାକାଣ୍ଡର ପରବର୍ତ୍ତୀ ଶୁଣାଣି ୨୦୨୪ ଜାନୁୟାରୀ ୮ ତାରିଖରେ କରାଯିବା ନେଇ ଧାର୍ଯ୍ୟ କରିଛନ୍ତି ଅଦାଲତ । ଏହି ଦିନ ପୁନର୍ବାର ସାକ୍ଷ୍ୟ ଗ୍ରହଣ ପ୍ରକ୍ରିୟା ଜାରି ରହିବ ବୋଲି ସୂଚନା ରହିଛି ।"