ଜଗତସିଂହପୁର:ଶେଷରେ ବିସ୍ଥାପିତ ଆନ୍ଦୋଳନକାରୀଙ୍କ ନିକଟରେ ପହଞ୍ଚିଲେ କମ୍ପାନୀ କର୍ତ୍ତୃପକ୍ଷ ଓ ଜିଲ୍ଲା ପ୍ରଶାସନ । ସମସ୍ତ ସମସ୍ତ ସମସ୍ୟାର ସମାଧାନର ପ୍ରତିଶ୍ରୁତି ପରେ ଧାରଣା ପ୍ରତ୍ୟାହୃତ ହୋଇଛି । ଜଗତସିଂହପୁର ଜିଲ୍ଲା ପାରାଦ୍ୱୀପ ଉପକଣ୍ଠ ହାଣ୍ଡିଆ ଅଞ୍ଚଳରେ ହାଣ୍ଡିଆ ଗ୍ରାମ୍ୟ ସୁରକ୍ଷା ସମିତି ପକ୍ଷରୁ ଚାଲିଥିବା ଧାରଣା ଶେଷରେ ପ୍ରତ୍ୟାହୃତ ହୋଇଛି । ଏଏମଏନଏସ କମ୍ପାନୀ କତ୍ତୃପକ୍ଷ ଓ ଗ୍ରାମ୍ୟ ସୁରକ୍ଷା କମିଟିର ମିଳିତ ବୈଠକ ପାରାଦ୍ୱୀପ ଅତିରିକ୍ତ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ପ୍ରଶାସନ ପକ୍ଷରୁ ସମାଧାନ କରିବାର ପ୍ରତିଶୃତି ମିଳିବା ପରେ ଧାରଣା ପ୍ରତ୍ୟାହୃତ ହୋଇଛି ।
ସୂଚନା ଅନୁଯାୟୀ, ପାରାଦ୍ୱୀପ ଉପକଣ୍ଠରେ ନିପନ ଷ୍ଟିଲ କମ୍ପାନୀ ପ୍ରତିଷ୍ଠା ପାଇଁ ହାଣ୍ଡିଆ ଗ୍ରାମବାସୀ ବିସ୍ଥାପିତ ହୋଇଥିଲେ । ହାଣ୍ଡିଆ ଗ୍ରାମବାସୀ ସେମାନଙ୍କ ଜୀବନ ଜୀବିକା ଭାବେ ଧାନ ପାନ ଓ ମାଛଚାଷ କରି ପରିବାର ଭରଣ ପୋଷଣ କରୁଥିଲେ। ହେଲେ କମ୍ପାନୀ କତ୍ତୃପକ୍ଷ ଓ ପ୍ରଶାସନ ବିସ୍ଥାପିତମାନଙ୍କୁ ଉଚିତ କ୍ଷତିପୂରଣ ଓ ଜୀବିକା ହରାଉଥିବା ବ୍ୟକ୍ତିମାନଙ୍କୁ କମ୍ପାନୀରେ ଚାକିରି ଦେବାକୁ ସେ ସମୟରେ ପ୍ରତିଶ୍ରୁତି ଦେଇଥିଲେ । ଏଥିସହ କମ୍ପାନୀ ଦ୍ୱାରା ପ୍ରଭାବିତ ଅଞ୍ଚଳରେ ଗମନାଗମନ, ପାନୀୟଜଳ, ସ୍ୱାସ୍ଥ୍ୟ ଓ ଶିକ୍ଷାର ବିକାଶ ପାଇଁ କମ୍ପାନୀ କତ୍ତୃପକ୍ଷ ବ୍ୟବସ୍ଥା କରିବେ ବୋଲି କୁହାଯାଇଥିଲା । କିନ୍ତୁ ଜମି ଅଧିଗ୍ରହଣ କାର୍ଯ୍ୟ ଶେଷ ହେବାପରେ କମ୍ପାନୀ କର୍ତ୍ତୃପକ୍ଷ ଏଥିପ୍ରତି ଧ୍ୟାନ ଦେଇନଥିଲେ । ତେଣୁ ଏନେଇ ଗ୍ରାମ୍ୟ ସୁରକ୍ଷା କମିଟି ଅତିରିକ୍ତ ଜିଲ୍ଲାପାଳଙ୍କ ନିକଟରେ ନିବେଦନ କରାଯାଇଥିଲା ।