ଜଗତସିଂହପୁର : ପ୍ରତିଶ୍ରୁତି ନାଁରେ ପ୍ରତାରଣା । ସ୍ଥାୟୀ ନିୟୁକ୍ତି ଓ ମୌଳିକ ସୁବିଧା ଯୋଗାଇ ଦେବା କଥା କହି ଲୋକଙ୍କୁ ଠକି ଦେଲା ମିତଲ କମ୍ପାନୀ । ଯାହାକୁ ନେଇ ଜଗତସିଂହପୁର ଜିଲ୍ଲା ପାରାଦ୍ୱୀପ ଉପକଣ୍ଠ ହାଣ୍ଡିଆ ଗ୍ରାମବାସୀ ଧାରଣା ଦେବା ସହ ପାରାଦ୍ୱୀପ ବିଧାୟକ ସମ୍ବିତ ରାଉତରାୟଙ୍କ ଉପରେ ବର୍ଷିଛନ୍ତି ।
ଗ୍ରାମବାସୀ ଅଭିଯୋଗ କରିଛନ୍ତି ଯେ, ମିତ୍ତଲ କମ୍ପାନୀ ସେମାନଙ୍କ ଭିଟାମାଟି ଛଡାଇ ନେଇଛି । କମ୍ପାନୀ ଜମି ଅଧିଗ୍ରହଣ ସମୟରେ ଯେଉଁ ପ୍ରତିଶ୍ରୁତି ଦେଇ ତାଙ୍କଠାରୁ ଜମି ନେଇଥିଲା ତାହା ଆଜି ପର୍ଯ୍ୟନ୍ତ ପୂରଣ କରିନାହିଁ । ଜମି ଅଧିଗ୍ରହଣ ସମୟରେ ଜିଲ୍ଲା ପ୍ରଶାସନ ସମ୍ମୁଖରେ କମ୍ପାନୀ ପ୍ରତିଶ୍ରୁତି ଦେଇଥିଲେ ଯେ କମ୍ପାନୀ ପାଇଁ ବିସ୍ଥାପିତ ହେଉଥିବା ଗ୍ରାମବାସୀମାନଙ୍କୁ ଅଗ୍ରାଧିକାର ଭିତ୍ତିରେ କମ୍ପାନୀରେ ଚାକିରି ଦିଆଯିବ । ଏଥି ସହିତ ଭିଟାମାଟି ହରାଇଥିବା ପରିବାରଙ୍କୁ ଅନ୍ୟତ୍ର ବାସପଯୋଗୀ ଜମି ଯୋଗାଇ ଦିଆଯିବ । ତାହା କିନ୍ତୁ ମିତ୍ତଲ କମ୍ପାନୀ କରିନାହିଁ ବୋଲି ଗ୍ରାମବାସୀ ଅଭିଯୋଗ କରିଛନ୍ତି ।
ଦୀର୍ଘ 6 ମାସ ହେବ ହାଣ୍ଡିଆ ଗ୍ରାମବାସୀମାନେ ପିଲା ଛୁଆଙ୍କୁ ଧରି ଧାରଣାରେ ବସିଥିଲେ ମଧ୍ୟ ପ୍ରଶାସନ କିମ୍ବା କମ୍ପାନୀ କତ୍ତୃପକ୍ଷ ବିସ୍ଥାପିତଙ୍କ ସହ ଆଲୋଚନା କରୁ ନଥିବା ଅଭିଯୋଗ ହୋଇଛି । ଅପର ପକ୍ଷରେ ପାରାଦ୍ୱୀପ ବିଧାୟକ ସମ୍ବିତ ରାଉତରାୟ ପାରାଦ୍ୱୀପରେ ବିସ୍ଥାପିତଙ୍କୁ ଥଇଥାନ କରିବା ପାଇଁ ପ୍ରୟାସ କରୁଥିବା କହିଥିଲେ । ଯାହାକୁ ନେଇ ହାଣ୍ଡିଆ ଗ୍ରାମବାସୀ ବିଧାୟକଙ୍କୁ ବିରୋଧ କରିଛନ୍ତି। ଦୀର୍ଘ 6 ମାସ ହେବ ନିଜ ହକ୍ ପାଇଁ ଲଢେଇ କରୁଥିବା ବେଳେ ଦିନେ ବି ବିଧାୟକ ସମ୍ବିତ ରାଉତରାୟ ତାଙ୍କ ସମସ୍ୟାର ସମାଧାନ ପାଇଁ ପ୍ରୟାସ କରି ନଥିବା ଗ୍ରାମବାସୀ ଅଭିଯୋଗ କରିଛନ୍ତି । ଯାହା ଦୁଃଖ ଓ ପରିତାପର ବିଷୟ, ବିଧାୟକ କମ୍ପାନୀ ସ୍ୱାର୍ଥରେ କାର୍ଯ୍ୟ କରୁଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି ।
ଏହା ମଧ୍ୟ ପଢନ୍ତୁ- ଜଗତସିଂହପୁର ଜିଲ୍ଲାପାଳଙ୍କୁ ଭେଟିଲେ ମିତ୍ତଲ ଷ୍ଟିଲ ପ୍ଲାଣ୍ଟର ପ୍ରତିନିଧି ଦଳ
ଏନେଇ ଗ୍ରାମବାସୀ କହିଛନ୍ତି, "ଆମେ ୧୪ ବର୍ଷ ହେଲାଣି ଗୋଟିଏ ଦାବି କରିଆସିଛୁ । ଆମକୁ ଜିଲ୍ଲା ପ୍ରଶାସନ ସ୍ଥାୟୀ ନିୟୁକ୍ତି ଓ ମୌଳିକ ସୁବିଧା ଯୋଗାଇ ଦେବା ନେଇ ପ୍ରତିଶୃତି ଦେଇଥିବା ସତ୍ତ୍ବେ ଆଜି ପର୍ଯ୍ୟନ୍ତ ପୂରଣ କଲେନି । ଯାହାକୁ ନେଇ ଆଜି ଆମେ ପୁଣି ଥରେ ଦାବି କରିଛୁ ।"
ଇଟିଭି ଭାରତ, ଜଗତସିଂହପୁର
