ପାରଳାଖେମୁଣ୍ଡିରେ ବିଜେଡିର ଜନସଂପର୍କ ପଦଯାତ୍ରା ଅନୁଷ୍ଠିତ

ଗଜପତି:ଆଜିଠୁ ବିଜେଡିର ଜନସମ୍ପର୍କ ପଦଯାତ୍ରା(Jan Sampark Padyatra) ଆରମ୍ଭ ହୋଇଛି । ଏହି କ୍ରମରେ ଗଜପତି ଜିଲ୍ଲା ପାରଳାଖେମୁଣ୍ଡି ଠାରେ ବିଜେଡିର ଜନସଂପର୍କ ପଦଯାତ୍ରା ଅନୁଷ୍ଠିତ ହୋଇଯାଇଛି । ଜିଲ୍ଲା ବିଜେଡି ସଭାପତି ପ୍ରଦୀପ ନାୟକଙ୍କ ନେତୃତ୍ବରେ ଅନୁଷ୍ଠିତ ଏହି ପଦଯାତ୍ରାରେ ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ ମୁଖ୍ୟ ଅତିଥି ଭାବେ ଯୋଗଦେଇ ଉଦଘାଟନ କରିଥିଲେ । ଏହାସହ ପଦଯାତ୍ରାର ଲକ୍ଷ୍ୟ ଏବଂ ଆଭିମୁଖ୍ୟ ସଂପର୍କରେ ଆଲୋକପାତ କରିଥିଲେ ।

ଗତ 22ବର୍ଷ ଧରି ରାଜ୍ୟରେ ବିଜେଡି ଶାସନ ଜାରି ରହିଥିବାବେଳେ, ଏହି ସମୟରେ ବହୁ ଲୋକାଭିମୁଖୀ ଯୋଜନା ପ୍ରସ୍ତୁତ ହୋଇଛି । ଯାହାଦ୍ବାରା ସାଧାରଣ ଲୋକେ ଉପକୃତ ହେଉଛନ୍ତି । ତେଣୁ ପ୍ରତି ନିର୍ବ।ଚନରେ ଦଳକୁ ଲୋକେ ଆଶୀର୍ବାଦ ଦେଉଥିବା ନିଜ ଅଭିଭାଷଣରେ ସାଂସଦ କହିଥିଲେ । ସ୍ଥାନୀୟ ଗାନ୍ଧୀ ଛକ ଠାରେ ଦଳୀୟ ନେତା ଓ କର୍ମୀ ଏକାଠି ହେବା ପରେ ଗାନ୍ଧୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ ପରେ ଏକ ବିରାଟ ଶୋଭାଯାତ୍ରାରେ ବାହାର ସହର ପରିକ୍ରମା କରିଥିଲା । ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତି ପାଖେ ପହଞ୍ଚି ପଦଯାତ୍ରା ଶେଷ କରାଯାଇଥିଲା ।

ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଜିଲ୍ଲା ଯୁବ ବିଜେଡି ସଭାପତି ଏସ.ଲିଙ୍ଗରାଜ, ବରିଷ୍ଠ ବିଜେଡି ନେତା ବସନ୍ତ ଦାଶ, ରୂପେଶ ପାଣିଗ୍ରାହୀ, ଡ.ତିରୁପତି ପାଣିଗ୍ରାହୀ, ଲକ୍ଷ୍ମୀୀକାନ୍ତ ପରିଚ୍ଛା, ଏନି ଶଙ୍କର ରାଓ ଏବଂ ସୁଜିତ ଦାଶଙ୍କ ସମେତ ଶତାଧିକ ବିଜେଡି ନେତା ଓ କର୍ମୀ ସାମିଲ ହୋଇଥିଲେ ।

ଏନେଇ ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ କହିଛନ୍ତି ଯେ, "ଗତ 29 ଏବଂ 30 ତାରିଥ ଦିନ ବିଜୁଜନତା ଦଳର ଦଳ ପ୍ରତିନିଧୀ, ପଞ୍ଚାୟତ ପ୍ରତିନିଧୀ ଏବଂ ନେତୃବୃନ୍ଦଙ୍କୁ ନେଇ ଏକ କର୍ମଶାଳା ଅନୁଷ୍ଠିତ ହୋଇଥିଲା । ଏହାର ମୁଖ୍ୟ ଉଦ୍ଦେଶ୍ୟ ହେଲା ଯେ, ମୁଖ୍ୟମନ୍ତ୍ରୀ କହିଥିଲେ ଯେ, ରାଜନୀତି ଏକ ମାଧ୍ୟମ । ନିର୍ବାଚନ ସରିଲା ପରେ ଆମେ ଲୋକମାନଙ୍କ ସେବା କରିବା ସହ ଉନ୍ନୟନମୂଳକ କାର୍ଯ୍ୟକରିବା ଆମର ଲକ୍ଷ୍ୟ । ଏବେ ଦୁର୍ଗାପୂଜା ଚାଲିଥିବାରୁ ସରିଲା ପରେ ପଞ୍ଚାୟତସ୍ତରରେ ଏହି କାର୍ଯ୍ୟକ୍ରମ ଚାଲିବ। ନଭେମ୍ବର 2 ପର୍ଯ୍ୟନ୍ତ ଏକ ମାସେବ୍ୟାପୀ ଜନସମ୍ପର୍କ ପଦଯାତ୍ରା ଚାଲିବ ।"

ଏହି ପଦଯାତ୍ରା ସମୟରେ ଅକ୍ଟୋବର 2 ତାରିଖରେ ଗାନ୍ଧୀ ଜୟନ୍ତୀ ଏବଂ ଶାସ୍ତ୍ରୀ ଜୟନ୍ତୀ, ଅକ୍ଟୋବର 9 ତାରିଖରେ ଉତ୍କଳମଣି ଗୋପବନ୍ଧୁ ଜୟନ୍ତୀ ଏବଂ ଅକ୍ଟୋବର 11 ତାରିଖରେ ଲୋକନାୟକ ଜୟପ୍ରକାଶ ଜୟନ୍ତୀ ପାଳନ ହେବ । ଏ ବର୍ଷର ଜନ ସମ୍ପର୍କ ପଦଯାତ୍ରା ଜିଲ୍ଲାସ୍ତରରୁ ଆରମ୍ଭ କରି ନିର୍ବାଚନମଣ୍ଡଳୀ, ନଗର, ପଞ୍ଚାୟତ ଏବଂ ୱାର୍ଡ଼ ପର୍ଯ୍ୟନ୍ତ ପ୍ରତ୍ୟେକ ସ୍ତରରେ ଆୟୋଜିତ ହେବ ।

ଇଟିଭି ଭାରତ, ଗଜପତି