ଦୁବାଇ:ଭାରତୀୟ ଟେନିସ ଷ୍ଟାର ସାନିଆ ମୀର୍ଜା ପୁଣି ଚର୍ଚ୍ଚାରେ । ଏଥର ନିଜର ଟେନିସ ଖେଳ ପାଇଁ ନୁହେଁ ବରଂ ଷ୍ଟାଡିୟମରେ ବସି କ୍ରିକେଟ ମ୍ୟାଚ୍ ଦେଖିବା ତାଙ୍କୁ ମହଙ୍ଗା ପଡିଛି । ଗୁରୁବାର ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ଚଳିତ ଟି-୨୦ ବିଶ୍ବକପର ଦ୍ବିତୀୟ ସେମିଫାଇନାଲ ମୁକାବିଲା ଅଷ୍ଟ୍ରେଲିଆ ଓ ପାକିସ୍ତାନ ମଧ୍ୟରେ ଖେଳାଯାଇଥିଲା । ଏହି ମ୍ୟାଚ୍ରେ ଦର୍ଶକ ଗ୍ୟାଲେରୀଙ୍କୁ ସାନିଆଙ୍କୁ ଦେଖିବାକୁ ମିଳିଥିଲା । କଡା ସଂଘର୍ଷପୂର୍ଣ୍ଣ ଏହି ସେମିଫାଇନାଲ ମ୍ୟାଚ୍ରେ ପାକିସ୍ତାନ ପକ୍ଷରୁ ପ୍ରତିନିଧିତ୍ବ କରୁଥିବା ସ୍ବାମୀ ସୋଏବ ମଲିକଙ୍କୁ ଚିୟର କରୁଥିବା ନଜର ଆସିଥିଲେ ସାନିଆ ।
ପାକିସ୍ତାନ ଟିମ୍କୁ ୩୪ ବର୍ଷୀୟ ସାନିଆଙ୍କ ସମର୍ଥନ ବିବାଦର କାରଣ ହୋଇଛି । ଷ୍ଟାଡିୟମରେ ସାନିଆଙ୍କ ଉପସ୍ଥିତିକୁ କିଛି ଭାରତୀୟ ଫ୍ୟାନ୍ସ ସହଜରେ ଗ୍ରହଣ କରିପାରିନାହାନ୍ତି । ଭାରତ ପ୍ରତି ବିଶ୍ବସ୍ତତା ଓ ସମର୍ଥନ ନେଇ ପ୍ରଶ୍ନ ଉଠାଇଛନ୍ତି ଫ୍ୟାନ୍ସ । ପ୍ରତିଦିନ ସୀମାରେ ଆମ ଜବାନଙ୍କ ମୃତ୍ୟର କାରଣ ହେଉଥିବା ଶତୃଦେଶର ବିଜୟ ପାଇଁ ଚିୟର କରୁଛନ୍ତି ବୋଲି ଟ୍ବିଟ୍ କରିଛନ୍ତି କିଛି ଫ୍ୟାନ୍ସ । ଆଉ କିଛିଜଣ ସମସ୍ତ ସୀମା ପାର୍ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ, ସାନିଆଙ୍କ ଭାରତୀୟ ନାଗରିକତା ବାତିଲ କରିବାକୁ ଦାବି କରିଛନ୍ତି । ଆଉ କିଛି ଜଣ ପ୍ରଶ୍ନ କରିଛନ୍ତି ଯେ, ପାକିସ୍ତାନକୁ ସମର୍ଥନ କରିବା କେଉଁପରି 'ଭାରତୀୟ' ସାନିଆ ମୀର୍ଜା ?"