ଭୁବନେଶ୍ବର:ଥାଇଲାଣ୍ଡରେ ଚମକିଲେ ଓଡିଶାର ଷ୍ଟାର ସଟଲର ପ୍ରମୋଦ ଭଗତ । ଥାଇଲାଣ୍ଡ ପାରା ବ୍ୟାଡମିଣ୍ଟନ ପ୍ରତିଯୋଗିତାରେ ଦୁଇଟି ସ୍ବର୍ଣ୍ଣ ପଦକ ଜିତିଛନ୍ତି ପ୍ରମୋଦ । ଏସଏଇ3 ପୁରୁଷ ଏକକ ଓ ଯୁଗଳ ଫାଇନାଲରେ ପ୍ରମୋଦ ଓ ତାଙ୍କ ଯୋଡିଦାର ସୁକାନ୍ତ କଦମ ବିଜୟୀ ସ୍ବର୍ଣ୍ଣ ପଦକ ଭେଟି ଦେଇଛନ୍ତି । ଏହା ସହ ପୁରୁଷ ଯୁଗଳ ସେମିଫାଇନାଲରେ ପରାସ୍ତ ହୋଇ ଦୀପରଞ୍ଜନ ବିଷ୍ଣୋଇ କାଂସ୍ୟ ପଦକରେ ସନ୍ତୁଷ୍ଟ ହୋଇଛନ୍ତି ।
ଉଭୟ ସିଙ୍ଗଲ୍ସ ଓ ଡବଲ୍ସରେ ଚମ୍ପିଆନ ହୋଇଛନ୍ତି ପ୍ରମୋଦ ଭଗତ । ପୁରୁଷ ଏକକ ଫାଇନାଲରେ ସେ ଇଂଲଣ୍ଡର ଡାନିଏଲ ବେଥେଲଙ୍କୁ ଭେଟିଥିଲେ । ପ୍ରମୋଦ ପ୍ରଥମ ଗେମକୁ 21-19 ସେଟରେ ଜିତି ନେଇଥିଲେ । ଆହତ ହେବାରୁ ଦ୍ବିତୀୟ ଗେମରେ ବେଥେଲ ଖେଳିନଥିଲେ । ମୁକାବିଲାରୁ ଓହରି ଯାଇଥିଲେ ବୋଥେଲ ଫଳରେ ପ୍ରମୋଦଙ୍କୁ ବିଜୟୀ ଘୋଷଣା କରାଯାଇଥିଲା । ଡବଲ୍ସରେ ସୁକାନ୍ତଙ୍କୁ ସାଥୀ କରି ନିତେଶ କୁମାର ଓ ତରୁଣ ଯୋଡିଙ୍କୁ 18-21, 21-14, 21-19 ସେଟରେ ପରାସ୍ତ କରିଥିଲେ । ଚଳିତ ବର୍ଷ ଖେଳାଯାଇଥିବା 4ଟି ଅନ୍ତର୍ଜାତୀୟ ପ୍ରତିଯୋଗିତାରେ ଏହା ପ୍ରମୋଦଙ୍କ ପ୍ରଥମ ସ୍ବର୍ଣ୍ଣ ସଫଳତା । ଅନ୍ୟ 3ଟି ପ୍ରତିଯୋଗିତାରେ ସେ କାଂସ୍ୟ ପଦକ ଜିତିଥିଲେ । ବିଶ୍ବ ରାକିଂରେ ଥାଇଲାଣ୍ଡ ପାରା ବ୍ୟାଡମିଣ୍ଟନରେ ରୌପ୍ୟ ବିଜେତା ଡାନିଏଲ ବେଥେଲ ପ୍ରଥମ ସ୍ଥାନରେ ରହିଥିବା ବେଳେ ପ୍ରମୋଦ ଭଗତ ଦ୍ବିତୀୟ ସ୍ଥାନରେ ରହିଛନ୍ତି । ଭାରତର ନିକେଶ କୁମାର ତୃତୀୟ ସ୍ଥାନରେ ରହିଛନ୍ତି ।