ହାଇଦ୍ରାବାଦ: ମହିଳା ଟି -20 ଚ୍ୟାଲେଞ୍ଜ(Women T20 Challenge) ପାଇଁ ବିସିସିଆଇ(BCCI) ଦଳ ଘୋଷଣା କରିଛି । ମହିଳା ଟି -20 ଚ୍ୟାଲେଞ୍ଜ 2022 ସିଜନ ପାଇଁ ହରମନ ପ୍ରୀତ୍ କୌରଙ୍କୁ ସୁପରନୋଭାସ୍ ଦଳର ଅଧିନାୟିକା ଦାୟିତ୍ବ ଦିଆଯାଇଥିବାବେଳେ ସ୍ମୃତି ମନ୍ଧାନାଙ୍କୁ ଟ୍ରେଲବ୍ଲେଜର ଏବଂ ଦୀପ୍ତି ଶର୍ମାଙ୍କୁ ଭେଲୋସିଟି ଦଳର ଅଧିନାୟକା ଦାୟିତ୍ବ ଦିଆଯାଇଛି ।
ଅଲ ଇଣ୍ଡିଆ ମହିଳା ଚୟନ କମିଟି ଏହି ୩ଟି ଦଳ ପାଇଁ ଖେଳାଳୀଙ୍କୁ ଚୟନ କରିଛି । ପ୍ରତ୍ୟେକ ଦଳରେ 16 ଜଣ ଖେଳାଳୀଙ୍କୁ ମନୋନୀତ କରାଯାଇଛି । ଆଇପିଏଲ୍ 2022 ମ୍ୟାଚର ଶେଷ ପର୍ଯ୍ୟାୟରେ ମହିଳା ଟି -20 ଚ୍ୟାଲେଞ୍ଜ ଆୟୋଜିତ ହେବ । ଏହି ସିଜନରେ ପୁଣେର ମହାରାଷ୍ଟ୍ର କ୍ରିକେଟ୍ ଷ୍ଟାଡିୟମ୍ (MCA) ରେ 23 ରୁ 28 ମେ ପର୍ଯ୍ୟନ୍ତ ମହିଳା ଟି -20 ଚ୍ୟାଲେଞ୍ଜ ଆୟୋଜିତ ହେବ ।
ଏହି ଟୁର୍ଣ୍ଣାମେଣ୍ଟ ବେଳେ ବିସିସିଆଇ ଏହି ସିଜନରେ ମୋଟ ୪ଟି ମ୍ୟାଚ୍ ଆୟୋଜନ କରିବାକୁ ଯାଉଛି । ଦକ୍ଷିଣ ଆଫ୍ରିକା, ଇଂଲଣ୍ଡ, ୱେଷ୍ଟଇଣ୍ଡିଜ୍ ଏବଂ ଅଷ୍ଟ୍ରେଲିଆକୁ ନେଇ ମୋଟ 12 ଜଣ ବିଦେଶୀ ଖେଳାଳୀ ମହିଳା ଟି -20 ଚ୍ୟାଲେଞ୍ଜର ଅଂଶଗ୍ରହଣ କରିବେ ବୋଲି ବିସିସିଆଇ ଘୋଷଣା କରିଛି । ମହିଳା ଟି -20 ଚ୍ୟାଲେଞ୍ଜ ମେ 23ରେ ସୁପରନୋଭାସ୍ ଏବଂ ଟ୍ରେଲବ୍ଲେଜର ମ୍ୟାଚ୍ ସହିତ ଆରମ୍ଭ ହେବ ।
ସିଜନର 3 ଟି ମ୍ୟାଚ୍ ଭାରତୀୟ ସମୟ ସନ୍ଧ୍ୟା 7.30 ରେ ଆରମ୍ଭ ହେବାକୁ ଥିବା ବେଳେ ମେ 24 ରେ ସୁପରନୋଭାସ୍ ଏବଂ ଭେଲୋସିଟି ମଧ୍ୟରେ ମ୍ୟାଚ୍ ଅପରାହ୍ନ 3.30ଟା ରୁ ଖେଳାଯିବ । ତୃତୀୟ ମ୍ୟାଚ୍ ମେ 26 ରେ ଭେଲୋସିଟି ଏବଂ ଟ୍ରେଲବ୍ଲେଜର ମଧ୍ୟରେ ହେବ । ମେ 28 ତାରିଖରେ ଫାଇନାଲ୍ ଖେଳାଯିବ । ବିସିସିଆଇ ଏହି ଟୁର୍ଣ୍ଣାମେଣ୍ଟରୁ ଭାରତୀୟ ଅଧିନାୟିକା ମିତାଲି ରାଜ ଏବଂ ଭେଟେରାନ ଫାଷ୍ଟ ବୋଲର ଝୁଲଣ ଗୋସ୍ବାମୀଙ୍କୁ ବିଶ୍ରାମ ଦେଇଛି ।