ଭୁବନେଶ୍ବର: ଆଜି ଭୁବନେଶ୍ବରରେ ପାଳିତ ହୋଇଯାଇଛି ବିଶ୍ବ ନାରିକେଳ ଦିବସ । ଭୁବନେଶ୍ବରରେ ଆୟୋଜିତ ଏକ ସ୍ବତନ୍ତ୍ର ଉତ୍ସବରେ ରାଜ୍ୟ କୃଷିମନ୍ତ୍ରୀ ଅରୁଣ ସାହୁ ଯୋଗଦେଇ କହିଛନ୍ତି, ଫନି କ୍ଷତିଗ୍ରସ୍ତ ନଡିଆ ଚାଷୀଙ୍କ ପାଇଁ ମୁଖ୍ୟମନ୍ତ୍ରୀ ପ୍ରଭାବିତ ପ୍ରତି ନଡିଆ ଗଛ ପିଛା ୫ଶହ ଟଙ୍କା ସହାୟତା ରାଶି ଘୋଷଣା କରିଥିଲେ । ସମସ୍ତ କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୂରଣ ଦିଆଯାଇଛି । ଆଉ କିଛି ବାକି ଅଛନ୍ତି ସେମାନଙ୍କୁ ମଧ୍ୟ ଖୁବଶୀଘ୍ର ସହାୟତା ଦିଆଯିବ ବୋଲି କହିଛନ୍ତି । ନଡିଆ ଚାରା ଯୋଗାଇବା ନେଇ କେନ୍ଦ୍ର ନାରିକେଳ ଉନ୍ନୟନ ବୋର୍ଡ କର୍ତ୍ତୃପକ୍ଷଙ୍କୁ ଅନୁରୋଧ କରାଯାଇଛି ବୋଲି ଏହି ଅବସରରେ ରାଜ୍ୟ କୃଷିମନ୍ତ୍ରୀ ଡ. ଅରୁଣ ସାହୁ କହିଛନ୍ତି ।
ଏହି କାର୍ଯ୍ୟକ୍ରମରେ କେନ୍ଦ୍ରକୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର ଯୋଗଦେଇ କହିଛନ୍ତି ଚାଷୀଙ୍କ ପାଇଁ ରାଜ୍ୟ ଯାହା ପ୍ରସ୍ତାବ ଦେବ କେନ୍ଦ୍ର ତାହା ତୁରନ୍ତ ବିଚାରକୁ ନେବ ବୋଲି କହିଛନ୍ତି । ଏହାସହ ନଡିଆ ଚାଷୀଙ୍କ ପାଇଁ ରାଜ୍ୟକୁ 29 କୋଟି ଅର୍ଥରାଶି ଦିଆଯାଇଛି ବୋଲି କେନ୍ଦ୍ର କୃଷିମନ୍ତ୍ରୀ କହିଛନ୍ତି । ଆୟୋଜିତ ଉତ୍ସବରେ ନଡିଆ ଚାଷ ସମ୍ପର୍କିତ ପ୍ରଦର୍ଶନୀ ହୋଇଥିଲା ।