ଆଗକୁ ବିଏମସି ନିର୍ବାଚନ: ବ୍ୟାନରରେ ଆଶାୟୀଙ୍କ ନୂଆବର୍ଷ ଶୁଭେଚ୍ଛା

ଭୁବନେଶ୍ବର ମହାନଗର ନିଗମ ଅଞ୍ଚଳରେ ନିର୍ବାଚନ ହେବାର ସମ୍ଭାବନା ଥିବାରୁ ଏଥିରେ ଅଧିକାଂଶ ଭାବେ ଆଶାୟୀ ପ୍ରାର୍ଥୀମାନେ ସେମାନଙ୍କ ସ୍ଥିତି ଜାହିର କରିବାକୁ ସୁବର୍ଣ୍ଣ ସୁଯୋଗ ଭାବି ନବବର୍ଷର ଶୁଭେଚ୍ଛା ଜଣାଉଥିବା ଦେଖିବାକୁ ମିଳୁଛି।

ଭୁବନେଶ୍ବର: ପୁରୁଣା ବର୍ଷ 2019 ବିଦାୟ ନେବା ସହିତ ଇଂରାଜୀ ନୂଆବର୍ଷ 2020 ପଦାର୍ପଣ କରିଛି। ଏହି ଅବସରରେ ନେତା ଠାରୁ ଆରମ୍ଭ କରି ଅଭିନେତା ଓ ଜନତା ପରସ୍ପରକୁ ଶୁଭେଚ୍ଛା ଜଣାଉଥିବା ଦେଖିବାକୁ ମିଳୁଛି। କିନ୍ତୁ ଏହା ଭୁବନେଶ୍ବର ମହାନଗର ନିଗମ ଅଞ୍ଚଳରେ ଅଧିକ ଭାବେ ଦେଖିବାକୁ ମିଳୁଛି। କାରଣ ଆଗକୁ ଏଠାରେ ନିର୍ବାଚନ ହେବାର ସମ୍ଭାବନା ଥିବାରୁ ଏଥିରେ ଅଧିକାଂଶ ଭାବେ ଆଶାୟୀ ପ୍ରାର୍ଥୀମାନେ ସେମାନଙ୍କ ସ୍ଥିତି ଜାହିର କରିବାକୁ ସୁବର୍ଣ୍ଣ ସୁଯୋଗ ଭାବି ନବବର୍ଷର ଶୁଭେଚ୍ଛା ଜଣାଉଥିବା ଦେଖିବାକୁ ମିଳୁଛି।

ବିଭିନ୍ନ ୱାର୍ଡ ଓ ସାହି ମାନଙ୍କରେ ନୂଆବର୍ଷର ଶୁଭେଚ୍ଛା ବାର୍ତ୍ତା ଜଣାଇ ପ୍ରଚାରପତ୍ର ଟାଙ୍ଗିବା ସହ ଘରଘର ବୁଲି ଲୋକଙ୍କୁ ଭେଟି କ୍ୟାଲେଣ୍ଡର ଓ ଡାଏରୀ ଆଦି ଦେଇଥିବା ମଧ୍ୟ ଦେଖାଯାଉଛି। ଏଥିରେ ଲୋକମାନଙ୍କ ପାଇଁ କାର୍ଯ୍ୟକରୁଥିବା ସ୍ବେଚ୍ଛାସେବୀଙ୍କ ଠାରୁ ଆରମ୍ଭ କରି ବିଭିନ୍ନ ରାଜନୈତିକ ଦଳର କାର୍ଯ୍ୟକର୍ତାମାନେ ସାମିଲ ଥିବାବେଳେ ମୁଖ୍ୟତଃ ଶାସକ ବିଜୁ ଜନତା ଦଳ ପକ୍ଷରୁ ଅଧିକାଂଶ ଆଶାୟୀ ପ୍ରାର୍ଥୀ ଅଧିକ ମାତ୍ରାରେ ସାମିଲ ଅଛନ୍ତି।

ସେହିପରି ବିରୋଧୀ ଦଳ ହିସାବରେ ଭାରତୀୟ ଜନତା ପାର୍ଟିର ଆଶାୟୀ ପ୍ରାର୍ଥୀ ମାନଙ୍କ ନିକଟରେ ମଧ୍ୟ ଏହି ଉତ୍ସାହ ଦେଖିବାକୁ ମିଳୁଥିବାବେଳେ କ୍ଵଚିତ କଂଗ୍ରେସ ଓ ଅନ୍ୟ ଦଳର ପ୍ରାର୍ଥୀ ମାନେ ଏହି ରେସରେ ସାମିଲ ଥିବା ଦେଖାଯାଇଛି।

ତେବେ ଏପର୍ଯ୍ୟନ୍ତ ପାଖାପାଖି ବର୍ଷେ କାଳ ଧରି ମହାନଗର ନିଗମ ଲୋକ ପ୍ରତିନିଧି ଶୂନ୍ୟ ଥିବାବେଳେ ସଂରକ୍ଷଣକୁ ନେଇ ଚାଲିଥିବା ମାମଲା ଏବେ କୋର୍ଟରେ ବିଚାରାଧୀନ ରହିଛି । ସେଥିପାଇଁ ନିର୍ବାଚନ ନେଇ ଅନିଶ୍ଚିତତା ଦେଖାଦେଇଥିବା ବେଳେ ଅଶାୟୀମାନେ ସରକାରଙ୍କ ନିକଟରେ ଯଥାଶୀଘ୍ର ନିର୍ବାଚନ କରିବା ନେଇ ଦାବି କରିଛନ୍ତି।

ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ