ନୂଆଦିଲ୍ଲୀ:ଗତବର୍ଷ ମହାରାଷ୍ଟ୍ରରେ ଦେଖାଯାଇଥିବା ରାଜନୈତିକ ସଙ୍କଟ ଓ କ୍ଷମତା ପରିବର୍ତ୍ତନ ବେଳେ ଶିବସେନାରୁ ବିଦ୍ରୋହ କରିଥିବା ତଥା ବର୍ତ୍ତମାନର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଏବଂ ଅନ୍ୟ 16 ତତ୍କାଳୀନ ଶିବସେନା ବିଧାୟକଙ୍କ ବିରୋଧରେ ସଭ୍ୟପଦ ରଦ୍ଦ ମାମଲା ହୋଇଥିଲା । ଉଦ୍ଧବ ଠାକରେ ଗୋଷ୍ଠୀ ଏହି ଆବେଦନ ସହ ସର୍ବୋଚ୍ଚ କୋର୍ଟରେ ଦ୍ବାରସ୍ଥ ହୋଇଥିଲା । ଦଳ ବିରୋଧରେ ବିଦ୍ରୋହ କରି ବିଜେପି ସହ ମେଣ୍ଟ ଗଠନ କରି ସରକାର ଗଠନ କରିଥିଲେ ଏକନାଥ ସିନ୍ଦେ । ସିନ୍ଦେଙ୍କ ସମେତ ତାଙ୍କ ସମର୍ଥିତ 16 ବିଧାୟକଙ୍କ ସଭ୍ୟପଦ ରଦ୍ଦ କରିବା ପାଇଁ ମାମଲା ହୋଇଥିଲେ ସୁଦ୍ଧା ତାହା ବର୍ତ୍ତମାନ ପର୍ଯ୍ୟନ୍ତ କୌଣସି ନିଷ୍କର୍ସରେ ପହଞ୍ଚି ପାରିନାହିଁ । ଆଜି ଏହି ମାମଲାରେ ସର୍ବୋଚ୍ଚ କୋର୍ଟ ଶୁଣାଣି କରିବା ସହ ମାତ୍ର ଏକ ସପ୍ତାହ ମଧ୍ୟରେ ନିଷ୍ପତ୍ତି ନେବାକୁ ବାଚସ୍ପତିଙ୍କୁ ନିର୍ଦ୍ଦେଶ ଦେଇଛନ୍ତି ।
ଆଜି(ସୋମବାର) ଏହି ସଭ୍ୟପଦ ଅଯୋଗ୍ୟତା ଆବେଦନ ଉପରେ ସୁପ୍ରିମକୋର୍ଟ ତ୍ୱରାନ୍ୱିତ ଶୁଣାଣି କରିଛନ୍ତି । ମହାରାଷ୍ଟ୍ର ବାଚସ୍ପତି ମାତ୍ର ସପ୍ତାହ ମଧ୍ୟରେ ଏହି ମାମଲାରେ ନିଷ୍ପତ୍ତି ଗ୍ରହଣ କରନ୍ତୁ ବୋଲି କୋର୍ଟ କହିଛନ୍ତି । ଏବେ ମହାରାଷ୍ଟ୍ର ବାଚସ୍ପତି ରାହୁଲ ନରଓ୍ବେକର ଏହି ମାମଲାରେ ଚୂଡାନ୍ତ ନିଷ୍ପତ୍ତି ଗ୍ରହଣ କରିବେ । ବର୍ତ୍ତମାନର ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ସମେତ 16ଜଣ ବିଧାୟକ ଶିବସେନାରୁ ଅଲଗା ହୋଇ ନିଜକୁ ମୁଖ୍ୟ ଶିବସେନା ଦଳ ବୋଲି ଦାବି କରିଥିଲେ । ହେଲେ ସେତେବେଳେ ମୂଳ ଶିବସେନାର ସଭାପତି ଥିବା ଉଦ୍ଧବ ଠାକରେ ଏହି ସିନ୍ଦେ ସମର୍ଥିତ ଗୋଷ୍ଠୀକୁ ବିଦ୍ରୋହୀ ଗୋଷ୍ଠୀ କହିବା ସହ ସମସ୍ତଙ୍କ ସଭ୍ୟପଦ ରଦ୍ଦ କରିବା ପାଇଁ ସର୍ବୋଚ୍ଚ କୋର୍ଟରେ ପହଞ୍ଚିଥିଲେ ।
ଅବଶ୍ୟ ଗୃହରେ ସଂଖ୍ୟା ବହୁମତ ପ୍ରମାଣିତ ହେବା ପୂର୍ବରୁ ତତ୍କାଳୀନ ମୁଖ୍ୟମନ୍ତ୍ରୀ ଉଦ୍ଧବ ଠାକରେ ରାଜ୍ୟପାଳଙ୍କୁ ଇସ୍ତଫାପତ୍ର ପ୍ରଦାନ କରିଥିଲେ । ଏକନାଥ ସିନ୍ଦେ ଗୋଷ୍ଠୀ ବିରୋଧୀ ବିଜେପି ସହ ମେଣ୍ଟ କରି ସରକାର ଗଠନ କରିଥିଲା । ପରେ ନିଜକୁ ମୁଖ୍ୟ ଶିବସେନା ବୋଲି ଦାବି କରି ନିର୍ବାଚନ କମିଶନଙ୍କ ଦ୍ବାରସ୍ଥ ହୋଇଥିଲା ସିନ୍ଦେ ଗୋଷ୍ଠୀ । ଦଳର ମୂଳ ନାମ(ଶିବସେନା) ଓ ଦଳୀୟ ସଙ୍କେତ ‘ଧନୁ-ତୀର’ ନିର୍ବାଚନ ଆୟୋଗ ସିନ୍ଦେ ଗୋଷ୍ଠୀକୁ ପ୍ରଦାନ କରିଥିଲେ । ଏହାକୁ ଗଣତନ୍ତ୍ରର ହତ୍ୟା ଓ କମିଶନ କେନ୍ଦ୍ରର ବିଜେପି ସରକାର ନିୟନ୍ତ୍ରଣରେ କାର୍ଯ୍ୟ କରୁଥିବା କହି ବର୍ଷିଥିଲେ ଉଦ୍ଧବ ଠାକରେ ।