ନୂଆଦିଲ୍ଲୀ: ବିଧାନସଭା ନିର୍ବାଚନରେ ହିନ୍ଦୀ ହାର୍ଟଲ୍ୟାଣ୍ଡରେ କ୍ଲିନସ୍ବିପ୍ କରିଛି ଭାରତୀୟ ଜନତା ପାର୍ଟି । ସବୁ ଆକଳନକୁ ପଛରେ ପକାଇ ଦଳ ରାଜସ୍ଥାନ, ମଧ୍ୟ ପ୍ରଦେଶ, ଓ ଛତିଶଗଡରେ କ୍ଷମତା ହାସଲ କରିଛି । ଏହାକୁ ନୂଆ ଭାରତର ଭୋଟିଂ ବୋଲି କହିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ଏହି ଫଳାଫଳରୁ ସ୍ପଷ୍ଟ ହୋଉଛି ଯେ, ନୂଆ ଭାରତ ପ୍ରଦର୍ଶନ ରାଜନୀତିକୁ ଭୋଟ ଦେଇଛି ବୋଲି ଶାହ କହିଛନ୍ତି । ସେ ଏହି ବିଜୟ ପାଇଁ ସେ ପ୍ରଧାନମନ୍ତ୍ରୀଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି ।
ଶାହ ଟ୍ବିଟ କରି କହିଛନ୍ତି, "ମୋଦିଜୀ ଲୋକଙ୍କ ହୃଦୟରେ ରହିଛନ୍ତି । ଆଜିର ଫଳାଫଳ ଏହା ସୂଚାଉଛି ଯେ, ଜାତିବାଦ ରାଜନୀତିର ଶେଷ ହୋଇଛି । ନୂଆ ଭାରତ କେବଳ ପ୍ରଦର୍ଶନ ରାଜନୀତିକୁ ହିଁ ଭୋଟ ଦେଇଛି । ଛତିଶଗଡ, ରାଜସ୍ଥାନ ଓ ମଧ୍ୟ ପ୍ରଦେଶବାସୀଙ୍କୁ ଏପରି ସମର୍ଥନ ପାଇଁ ସାଲ୍ୟୁଟ୍ । ଭାରତୀୟ ଜନତା ପାର୍ଟିର ଏହି ବିଶାଳ ବିଜୟ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଶୁଭେଚ୍ଛା ।"
ଆଜି ଫଳାଫଳ ସ୍ପଷ୍ଟ ହେବା ପରେ ପ୍ରଧାନମନ୍ତ୍ରୀ ଟ୍ବିଟ କରି ଶୁଭେଚ୍ଛା ଜଣାଇଥିଲେ । ଏହାପରେ ସେ ଦଳୀୟ ମୁଖ୍ୟାଳୟରେ ମଧ୍ୟ କାର୍ଯ୍ୟକର୍ତ୍ତାଙ୍କୁ ସମ୍ବୋଧିତ କରୁଛନ୍ତି । ପ୍ରଧାନମନ୍ତ୍ରୀଙ୍କୁ ଭାଜପା ମୁଖ୍ୟାଳୟରେ ଭବ୍ୟ ସ୍ବାଗତ କରିଥିଲେ କାର୍ଯ୍ୟକର୍ତ୍ତା । ଏହି ବିଶାଳ ବିଜୟକୁ ‘ମୋଦି ଗ୍ୟାରେଣ୍ଟି’ ବୋଲି ନାରା ଦେଇଥିଲେ ।