ଚେନ୍ନାଇ: ''ସନାତନ ଧର୍ମ ମ୍ୟାଲେରିଆ, ଡେଙ୍ଗୁ ଭଳି । ଏହାକୁ କେବଳ ବିରୋଧ କଲେ ଚଳିବ ନାହିଁ, ବରଂ ସବୁଦିନ ପାଇଁ ବିଲୋପ କରିବାକୁ ପଡିବ । କାରଣ ସନାତନ ଧର୍ମ ସାମାଜିକ ନ୍ୟାୟ ଓ ସମାନତାର ବିରୁଦ୍ଧାଚରଣ କରୁଛି ।'' ସନାତନ ଧର୍ମ ଉପରେ ଏଭଳି କିଛି ମନ୍ତବ୍ୟ ଦେଇ ଏବେ ବିବାଦ ଘେରକୁ ଆସିଛନ୍ତି ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କ ପୁଅ ତଥା ମନ୍ତ୍ରୀ ଉଦୟନିଧି ଷ୍ଟାଲିନ । ହିନ୍ଦୁ ଧର୍ମକୁ ନେଇ ବିଗତ ଦିନରେ କିଛି ରାଜନେତା ବିବାଦୀୟ ବୟାନ ଦେଇଥିବା ବେଳେ ଏହି ତାଲିକାରେ ଏବେ ଉଦୟନିଧି ମଧ୍ୟ ଯୋଡି ହୋଇଛନ୍ତି ।
ଶନିବାର ଦିନ 'ସନାତନ ଉଚ୍ଛେଦ ସମ୍ମିଳନୀ'ରେ ଉଦବୋଧନ ଦେଇ ଉଦୟନିଧି ଷ୍ଟାଲିନ ଏକଥା କହିଛନ୍ତି । ଏହି ସମୟର ତାଙ୍କର ଏକ ଭିଡିଓ ମଧ୍ୟ ଭାଇରାଲ ହେଉଛି । ମନ୍ତ୍ରୀ ଉଦୟନିଧି କହିଛନ୍ତି ଯେ, କିଛି ଜିନିଷକୁ ବିରୋଧ କରାଯାଇ ପାରିବ ନାହିଁ, ଏହାକୁ ଉଚ୍ଛେଦ କରିବାକୁ ପଡିବ । ଆମେ ଡେଙ୍ଗୁ, ମ୍ୟାଲେରିଆ ଓ କୋରୋନାକୁ ବିରୋଧ କରିପାରିବା ନାହିଁ । ଏହାକୁ ଦୂର କରିବା ଆବଶ୍ୟକ । ସେହିଭଳି ସନାତନ ଧର୍ମକୁ କେବଳ ବିରୋଧ କରାଯାଇ ପାରିବ ନାହିଁ, ଏହାକୁ ବିଲୋପ କରିବାକୁ ପଡିବ । ସଂସ୍କୃତରୁ ସନାତନ ନାମ ଆସିଛି । ଏହା ସାମାଜିକ ନ୍ୟାୟ ଓ ସମାନତା ବିରୋଧି ଅଟେ । ସନାତନର ଅର୍ଥ ସ୍ଥିର, ଯାହାକୁ ବଦଳାଯାଇ ପାରିବ ନାହିଁ । ଏହାସହିତ ସନାତନ ଧର୍ମ ଉଚ୍ଛେଦ ନାମରେ ସମ୍ମିଳନୀ ଆୟୋଜନ କରିଥିବାରୁ ସେ ଏହାର ଆୟୋଜକ ସମିତିକୁ ପ୍ରଶଂସା କରିଛନ୍ତି ।