ସମ୍ବଲପୁରରେ ମୋଦିଙ୍କ ବିଶାଳ ସମାବେଶ, 18 ପ୍ରକଳ୍ପର ଉଦଘାଟନ ସହ କଳେ ଶିଳାନ୍ୟାସ ସମ୍ବଲପୁର: ସମ୍ବଲପୁର ଗସ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି l ଆଜି ପ୍ରଧାନମନ୍ତ୍ରୀ ଅପରାହ୍ନ ପ୍ରାୟ 2 ଟା ସମୟରେ ସମ୍ବଲପୁର ଆଇଆଇଏମ ସ୍ଥାୟୀ କ୍ୟାମ୍ପସକୁ ଝାରସୁଗୁଡାରୁ ହେଲିକେପଟର ଯୋଗେ ପହଞ୍ଚିଥିଲେ l ଏଠାରେ ପହଞ୍ଚିବା ପରେ ସମ୍ବଲପୁର ଆଇଆଇଏମର ନୂତନ କ୍ୟାମ୍ପସର ଶୁଭ ଉଦଘାଟନ କରିବା ସହିତ ଅନ୍ୟ ବିଭିନ୍ନ ପ୍ରକଳ୍ପର ଉଦଘାଟନ ଭିତ୍ତି ପ୍ରସ୍ତର ସ୍ଥାପନା କରିଥିଲେ l
ଏହା ପରେ ଏଠାରେ ଯୋଗ ଦେଇଥିବା ଛାତ୍ରଛାତ୍ରୀ ବିଶିଷ୍ଟ ବ୍ୟକ୍ତିଙ୍କ ସମାବେଶରେ ଯୋଗଦେଇଥିଲେ ମୋଦି l ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ରାଜ୍ୟପାଳ ରଘୁବର ଦାସ , କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ , ରେଳମନ୍ତ୍ରୀ ଅଶ୍ବିନୀ ବୈଷ୍ଣବ କେନ୍ଦ୍ର ଆଦିବାସୀ କଲ୍ୟାଣ ମନ୍ତ୍ରୀ ବିଶେଶ୍ବର ଟୁଡୁ , ରେଙ୍ଗାଲି ବିଧାୟକ ନାଉରୀ ନାଏକ , ସାଂସଦ ନୀତେଶ ଗଙ୍ଗଦେବ ପ୍ରମୁଖଙ୍କ ସହ ଆଇଆଇଏମ ନିର୍ଦେଶକ ମହାଦେବ ପ୍ରସାଦ ଜୟସ୍ବାଲ ପ୍ରମୁଖ ଉପସ୍ଥିତ ରହିଥିଲେ l
ଅଧିକ ପଢନ୍ତୁ- କଂଗ୍ରେସ ଗରିବୀ ଓଡିଶା ପ୍ରଚାର କରୁଥିଲା, ବିଜେପି ସମୃଦ୍ଧ ଓଡିଶାକୁ ବିଶ୍ବସ୍ତରରେ ପହଞ୍ଚାଇଛି: ପ୍ରଧାନମନ୍ତ୍ରୀ
ଲୋକାର୍ପଣ ଉତ୍ସବରେ ମୁଖ୍ୟମନ୍ତ୍ରୀ ନଵୀନ ପଟ୍ଟନାୟକ ଭବ୍ୟ ଶିକ୍ଷାନୁଷ୍ଠାନ ପାଇଁ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଦେବାସହ ଏହି ଶିକ୍ଷାନୁଷ୍ଠାନ ଆଗାମୀ ପୀଢି ପାଇଁ ପଥପ୍ରଦର୍ଶକ ହେବ ବୋଲି କହିଛନ୍ତି l ଆଇଆଇଏମ ଲୋକାର୍ପଣ ସହ ଅନ୍ୟ 18 ଗୋଟି ପ୍ରକଳ୍ପର ଉଦଗାଟନ ଓ ଶିଳାନ୍ୟାସ କରି ପ୍ରଧାନମନ୍ତ୍ରୀ ସମ୍ବୋଧିତ କରିଥିଲେ। ପରେ ଆଇଆଇଏମ ପରିସରରୁ ବିଦାୟ ନେଇ ରେମେଡ ପଡିଆରେ ଆୟୋଜିତ ଦଳୀୟ କାର୍ଯ୍ୟକ୍ରମରେ ସାମିଲ ହୋଇଥିଲେ ।
ସମ୍ବଲପୁର ରେମେଡ ଛକ ସ୍ଥିତ ପଡିଆରେ ଆୟୋଜିତ ବିଶାଳ ଗ୍ୟାରେଣ୍ଟି ସମାବେରେ ପ୍ରାୟ 3 ଟାରେ ପହଞ୍ଚିଥିଲେ l ଏହି ସମାବେଶରେ ଲକ୍ଷାଧିକ ସାଧରଣ ଜନତା ମୋାଦିଙ୍କ ଅଭିଭାଷଣ ଶୁଣିବାକୁ ଅପେକ୍ଷା କରିଥିବା ବେଳେ ମୋଦି ଜୟ ଜଗନ୍ନାଥ, ଜୟ ମା ସମଲେଇ କହିବା ସହ ସମ୍ବଲପୁରୀ ଭାଷାରେ ଲୋକଙ୍କୁ ନୁଆଁ ବର୍ଷ ପୁଷପୁନି ପର୍ବର ଶୁଭେଚ୍ଛା ଜଣାଇଥିଲେ l ଏହାପରେ ସମ୍ବୋଧନ କରି ପ୍ରଧାନମନ୍ତ୍ରୀ ନିଜର ଅଭିଭାଷଣ ମାଧ୍ୟମରେ ବିଗତ 10 ବର୍ଷ ମଧ୍ୟରେ କେନ୍ଦ୍ର ବିଜେପି ସରକାରର ଲୋକାଭିମୁଖୀ ଯୋଜନା ଗୁଡିକ ସଫଳତା ବିଷୟରେ ବଖାଣି ଥିଲେ l ନିଜ ଅଭିଭାଷଣ ରେ ମୋଦି କଂଗ୍ରେସକୁ କରିଥିଲେ ଟାର୍ଗେଟ l ଏହି କାର୍ଯ୍ୟକ୍ରମରେ ମୋଦି ରାଜ୍ୟ ବିଜେଡି ସରକାର ବିରୋଧରେ ପଦଟିଏ ମଧ୍ୟ କହି ନଥିଲେ l ନିଜ ଅଭିଭାଷଣ ରେ ମୋଦି ବରିଷ୍ଠ ବିଜେପି ନେତା ଲାଲକୃଷ୍ଣ ଆଡଭାନୀଙ୍କୁ ଭାରତ ରତ୍ନ ଦିଆଯିବା କଥା କହିବା ସହ ତାଙ୍କୁ ଶୁଭେଚ୍ଛା ଜଣାଇବା ସହ ତାଙ୍କ ଦୀର୍ଘାୟୁ କାମନା କରିଥିଲେ l ଏହା ସହ ସେ ଚଳିତ ବଜେଟରେ ଗରିବ ଲୋକଙ୍କ ପାଇଁ ପ୍ରାଥମିକତା ଦିଆଯାଇଥିବା କହିଥିଲେ l ଏହି ବଜେଟ ଗରିବ ଲୋକଙ୍କ ଆର୍ଥିକ ସ୍ଥିତିକୁ ସୁଦୃଢ କରିବାର ଗ୍ୟାରେଣ୍ଟି ଅଟେ l ଗରିବ ଲୋକଙ୍କୁ ପକ୍କା ଘର ପ୍ରଦାନ କରିବାର ମୋଦିର ଗ୍ୟାରେଣ୍ଟି ରହିଛି ବୋଲି କହିଥିଲେ l ବିଗତ 10 ବର୍ଷ ମଧ୍ୟରେ 4 କୋଟି ଲୋକଙ୍କୁ ପକ୍କା ଘର ମିଳିଛି l ଏଥିରେ 25 ଲକ୍ଷ ଓଡ଼ିଆ ହିତାଧିକାରୀ ମଧ୍ୟ ଅଛନ୍ତି l ଓଡିଶାର ବିକାଶ ପାଇଁ କୌଣସି ପ୍ରକାର ଅସୁବିଧା ରହିବ ନାହିଁ l ଆମେ ଗରିବଙ୍କ ପାଇଁ ସବୁବେଳେ ଚିନ୍ତା କରୁଛୁ l ଏଥିପାଇଁ ଆହୁରି 2 କୋଟି ଗରିବ ଲୋକଙ୍କୁ ପକ୍କା ଘର ପ୍ରଦାନ କରାଯିବାର ଚଳିତ ବଜେଟରେ ପ୍ରବଧାନ ରହିଛି l ଏହାସହ କେନ୍ଦ୍ର ସରକାର ଚାଷୀ,ପଶୁପାଳନ ଓ ମତ୍ସ୍ୟ ଚାଷୀ ଙ୍କ ଉପରେ ଅଧିକ ପ୍ରାଥମିକତା ଦେଉଛନ୍ତି l ଏହି ଭଳି 1 କୋଟି ଚାଷୀଙ୍କୁ ପିଏମ କିସାନ ଯୋଜନା ରେ ଅନ୍ତର୍ଭୁକ୍ତ କରାଯାଇଛି l
ଏଥିରେ ଓଡ଼ିଶାର 40 ଲକ୍ଷ ଚାଷୀ ଅଛନ୍ତି l ପ୍ରତ୍ୟେକ ଚାଷୀଙ୍କୁ 30 ହଜାର ଟଙ୍କା ଲେଖାଏଁ ପ୍ରଦାନ କରାଯାଇଛି l 2014 ପୂର୍ବରୁ ତତ୍କାଳୀନ ସରକାର ଓଡ଼ିଶାର ଚାଷୀଙ୍କ ଠାରୁ 36 ହଜାର କୋଟି ଟଙ୍କାର ଧାନ କିଣି ଥିଲେ l ଆଉ ବର୍ତ୍ତମାନର ସରକାର 1 ଲକ୍ଷ 10 ହଜାର କୋଟି ଟଙ୍କାର ଧାନ କିଣିଛନ୍ତି l ଏହାଦ୍ବାରା ଚାଷୀଙ୍କ ଆର୍ଥିକ ସ୍ଥିତି ସୁଦୃଢ ହୋଇଛି l ଚାଷୀଙ୍କ ସୁବିଧା ପାଇଁ ବର୍ତ୍ତମାନ କେନ୍ଦ୍ର ସରକାର ନାନୋ ୟୁରିଆ ପରେ ନାନୋ ଡ଼ିଏପି ସାରର ବ୍ୟବସ୍ଥା କରିବାକୁ ଯାଉଛନ୍ତି l ଆଗକୁ ମତ୍ସ୍ୟଜୀବି ଙ୍କ ପାଇଁ ପ୍ରୋତ୍ସାହନ ବୃଦ୍ଧି କରାଯିବ l ଏଥିରେ ଓଡ଼ିଶାର ଚାଷୀ ମଧ୍ୟ ଲାଭବାନ ହେବେ l କେନ୍ଦ୍ର ସରକାର ମତ୍ସ୍ୟ ପାଳନ ପାଇଁ ସ୍ବତନ୍ତ୍ର ମନ୍ତ୍ରାଳୟ କରିଛନ୍ତି l ଏହିଭଳି ମତ୍ସ୍ୟଚାଷୀ ମାନଙ୍କୁ କିସାନ କ୍ରେଡିଟ କାର୍ଡର ସୁବିଧା କରାଯାଇ ଏମାନଙ୍କ ପାଇଁ 5 ଲକ୍ଷ ଟଙ୍କାର ବୀମା ସୁବିଧା କରାଯାଇଛି l ବର୍ତମାନ ଦେଶରେ ମତ୍ସ୍ୟ ଉତ୍ପାଦନ କ୍ଷେତ୍ରରେ ରେକର୍ଡ ଅଭିବୃଦ୍ଧି ହୋଇଛି l ଏହାଦ୍ବାରା ମତ୍ସ୍ୟଚାଷୀ ମାନଙ୍କର ଆର୍ଥିକ ସ୍ଥିତି ସ୍ଵଛଳ ହୋଇଛି ବୋଲି ପ୍ରଧାନମନ୍ତ୍ରୀ କହିଛନ୍ତି l ଏହାସହ 25 ଲକ୍ଷ ଓଡ଼ିଆ ଗରିବ ଲୋକଙ୍କୁ ବିଦ୍ୟୁତ ସେବା ଯୋଗାଇ ଦିଆଯାଇଛି l ଆଗକୁ ମଧ୍ୟ ଦେଶର 1 କୋଟି ଗରିବ ଲୋକଙ୍କୁ ସୌର ଶକ୍ତି ଚାଳିତ ବିଦ୍ୟୁତ ସଂଯୋଗୀ କରଣ ସେବା କରିବାର ଚଳିତ ବଜେଟରେ ବ୍ୟବସ୍ଥା ରହିଛି l କେନ୍ଦ୍ର ସରକାର ମହିଳା ଓ ଶିଶୁଙ୍କ ସ୍ବାସ୍ଥ୍ୟସେବା ପାଇଁ ବହୁ କାର୍ଯ୍ୟକ୍ରମ ହାତକୁ ନେଇଛନ୍ତି l ଏଥିପାଇଁ ଆଶା ଓ ଅଙ୍ଗନବାଡି ଦିଦିଙ୍କୁ ଆୟୁଷ୍ମାନ ଯୋଜନାରେ ସାମିଲ କରାଯାଇ 5 ଲକ୍ଷ ଟଙ୍କାର ଚିକିତ୍ସା ସେବା ମାଗଣାରେ ଯୋଗାଇ ଦେବାର ବ୍ୟବସ୍ଥା କରିଛନ୍ତି l କେନ୍ଦ୍ର ସରକାର ମହିଳା ସଶକ୍ତିକରଣ ଉପରେ ପ୍ରାଥମିକତା ଦେଉଛନ୍ତି l
ଏଥିପାଇଁ 55 ଲକ୍ଷ ଭଉଣୀ ଙ୍କୁ ଉଜ୍ବଲା ଗ୍ୟାସ ସେବା ପ୍ରଦାନ କରାଯାଇଥିବା ବେଳେ 1 କୋଟି ଲକ୍ଷପତି ଦିଦି ସୃଷ୍ଟି କରଯାଇଛି l ଏହାସହ ଆଉ 3 କୋଟି ଲକ୍ଷପତି ଦିଦି ସୃଷ୍ଟି କରାଯିବ ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି l ପୂର୍ବର ସରକାର ଆଦିବାସୀ ମାନଙ୍କୁ କେବେଳ ଭୋଟ ବ୍ୟାଙ୍କ କରି ରଖିଥିଲେ l ଆମ ସରକାର ଆଦିବାସୀ ମାନଙ୍କ କଲ୍ୟାଣକୁ ପ୍ରାଥମିକତା ଦେଉଛି l ଶେଷରେ ପ୍ରଧାନମନ୍ତ୍ରୀ ଓଡ଼ିଶାର ଜଣାଶୁଣା ସିନେ ନିର୍ଦ୍ଦେଶକ ପ୍ରଯୋଜକ ଅଭିନେତା ସ୍ବର୍ଗତ ସାଧୁ ମେହେରଙ୍କୁ ଶ୍ରଦ୍ଧାଞ୍ଜଳି ଦେଇଥିଲେ l ପଶ୍ଚିମ ଓଡିଶାର ବରପୁତ୍ର ସ୍ବାଧୀନତା ସଂଗ୍ରାମୀ ବୀର ସୁରେନ୍ଦ୍ର ସାଏ, ସ୍ବଭାବ କବି ଗଙ୍ଗାଧର ମେହେର ସନ୍ଥକବି ଭୀମ ଭୋଇଙ୍କ ଭଳି ମହାପୁରୁଷଙ୍କ ସ୍ମୃତି ଚାରଣ କରିଥିଲେ । ଏହାସହ ପଦ୍ମ ସମ୍ମାନ ପାଇଁ ଚଳିତ ବର୍ଷ ଘୋଷଣା ହୋଇଥିବା ପଦ୍ମଶ୍ରୀ ଗୋପୀନାଥ ସ୍ବାଇଁ, ବିନୋଦ ମହାରଣା, ଭାଗବତ ପ୍ରଧାନ ଓ ବିନୋଦ କୁମାର ପଶାୟତଙ୍କୁ ଶୁଭେଚ୍ଛା ଅଭିନନ୍ଦନ ଜଣାଇଥିଲେ।
ଇଟିଭି ଭାରତ, ସମ୍ବଲପୁର
