ନିଆଳି: ବାରମ୍ବାର ଅଭିଯୋଗ ସତ୍ତ୍ୱେ କର୍ଣ୍ଣପାତ କଲାନି ପ୍ରଶାସନ । ସ୍ଥାନୀୟ ପ୍ରଶାସନ କିମ୍ବା ଜିଲ୍ଲା ପ୍ରଶାସନ ଅଭିଯୋଗ ଶୁଣିଲେନି କିମ୍ବା କୌଣସି କାର୍ଯ୍ୟାନୁଷ୍ଠାନ ମଧ୍ୟ ନେଲେନାହିଁ । ଶେଷରେ ବାଧ୍ୟ ହୋଇ ଗାଁର ମହିଳାମାନେ ବେଆଇନ ବାଲିଘାଟରୁ ମେସିନ ସାହାଯ୍ୟରେ ବାଲି ଲୁଟ ସମୟରେ ମେସିନ ଜବତ କରିଛନ୍ତି ଏବଂ ପରେ ପୋଲିସ ଜିମା ଦେଇଛନ୍ତି । ଏହାସହ ତୁରନ୍ତ ବେଆଇନ ବାଲି ଚାଲାଣ ଉପରେ କାର୍ଯ୍ୟାନୁଷ୍ଠାନ ନେବା ପାଇଁ ଦାବି କରିଛନ୍ତି ଦେବୀ ନଦୀର ପୂର୍ବ ପାରି ବଡ ଖରମଙ୍ଗା ଗ୍ରାମବାସୀ ।
ମିଳିଥିବା ସୂଚନା ଅନୁସାରେ କଟକ ଜିଲ୍ଲା କଣ୍ଟାପଡ଼ା ତହସିଲ ଅଧିନସ୍ଥ ତଥା ଗୋବିନ୍ଦପୁର ଥାନା ଝାରପଡା ପଞ୍ଚାୟତସ୍ଥିତ ଦେବୀ ନଦୀର ପୂର୍ବ ପାରି ବଡ ଖରମଙ୍ଗା ନିକଟରୁ ବେଆଇନ ବାଲିଘାଟ ଚାଲୁଥିବା ନେଇ ସ୍ଥାନୀୟ ଗ୍ରାମବାସୀମାନେ ବାରମ୍ବାର ଅଭିଯୋଗ କରିଆସୁଥିଲେ । କିଛି ମାସ ହେବ ବିନା ନିଲାମରେ ଚୋରାରେ ମେସିନ ସାହାଯ୍ୟରେ ବାଲି ଉତ୍ତୋଳନ ଯୋଗୁଁ ଆଗାମୀ ଦିନରେ ବଡ ଖରମଙ୍ଗା ଗାଁ ପ୍ରତି ବିପଦ ରହିଛି ବୋଲି ଆଶଙ୍କା କରି ବେଆଇନ ବାଲି ଘାଟକୁ ବିରୋଧ କରିଥିଲେ ବଡ ଖରମଙ୍ଗା ଗ୍ରାମବାସୀ । ତେବେ ବାରମ୍ବାର ଅଭିଯୋଗ କରିବା ପରେ ମଧ୍ୟ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଗଲାନାହିଁ । ପରେ ସ୍ଥାନୀୟ ଲୋକମାନେ ରାତିରେ ବେଆଇନ ବାଲିଘାଟକୁ ବିରୋଧ କରିବା ସହିତ ଦିନରେ ମଧ୍ୟ ଗ୍ରାମର ମହିଳା ଓ ପୁରୁଷମାନଙ୍କ ପକ୍ଷରୁ ବିରୋଧ କରାଯାଇଥିବା ନେଇ ଅଭିଯୋଗ ହୋଇଛି ।