ହାଇଦ୍ରାବାଦ: ଆଜି ବିଶ୍ବର ସର୍ବବୃହତ ଗଣତାନ୍ତ୍ରିକ ରାଷ୍ଟ୍ର ଭାରତର ୭୫ତମ ସାଧାରଣତନ୍ତ୍ର ଦିବସ । ଗଣତନ୍ତ୍ରର ମହାନ ପର୍ବ । ଆଜିର ଏହି ପବିତ୍ର ଅବସରରେ ତିରଙ୍ଗାମୟ ହୋଇଛି ଦିଲ୍ଲୀଠୁ ପଲ୍ଲୀ । ସବୁଠୁ ଫର୍ଫର୍ ହୋଇ ଉଡୁଛି ତ୍ରିରଙ୍ଗା । ଦେଶର କୋଣ ଅନୁକୋଣରୁ ଭାସିଆସୁଛି ବନ୍ଦେ ମାତରମ୍ ଓ ଭାରତ ମାତାର ଜୟ ଧ୍ବନି । ଭାରତ ବ୍ରିଟିଶ ଶାସନରୁ ୧୯୪୭ ମସିହାରେ ମୁକ୍ତ ହୋଇଥିଲା, କିନ୍ତୁ ୧୯୫୦ ମସିହା ଜାନୁୟାରୀ ୨୬ରେ ଦେଶରେ ନୂତନ ସମ୍ବିଧାନ କାର୍ଯ୍ୟକାରୀ ହୋଇଥିଲା । ଆଜି ଗଣତନ୍ତ୍ରର ଏହି ମହାନ ପର୍ବରେ ପ୍ରଧାନମନ୍ତ୍ରୀ ମୋଦି, ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ରାଜ୍ୟପାଳ ରଘୁରବ ଦାସଙ୍କ ଠାରୁ ଆରମ୍ଭ କରି ଦେଶର ବିଭିନ୍ନ ମାନଗଣ୍ୟ ବ୍ୟକ୍ତିବିଶେଷ ଦେଶବାସୀଙ୍କୁ ସାଧାରଣତନ୍ତ୍ର ଦିବସର ଶୁଭେଚ୍ଛା ଜଣାଇଛନ୍ତି ।
ପ୍ରଧାନମନ୍ତ୍ରୀ ମୋଦି ଏକ୍ସରେ ପୋଷ୍ଟ କରି ସମଗ୍ର ଭାରତବାସୀଙ୍କୁ ନିଜର ପରିବାର ରୂପେ ସମ୍ବୋଧନ କରି ସାଧାରଣତନ୍ତ୍ର ଦିବସର ଅଭିନନ୍ଦନ ଜଣାଇଛନ୍ତି । ମୋଦି ଲେଖିଛନ୍ତି, ''ଦେଶର ମୋର ସମସ୍ତ ପରିବାରଜନଙ୍କୁ ଗଣତନ୍ତ୍ର ଦିବସର ବହୁତ ବହୁତ ଶୁଭକାମନା । ଜୟ ହିନ୍ଦ୍ ।''
ଗୃହମନ୍ତ୍ରୀ ଅମିତ ଶାହ ଲେଖିଛନ୍ତି, ''ସମସ୍ତ ଦେଶବାସୀଙ୍କୁ ଗଣତନ୍ତ୍ର ଦିବସର ହାର୍ଦ୍ଦିକ ଅଭିନନ୍ଦନ । ଗଣତନ୍ତ୍ରର ଏହି ପବିତ୍ର ଅବସରରେ ସବୁ ସ୍ବାଧୀନତା ସଂଗ୍ରାମୀ, ସମ୍ବିଧାନ ପ୍ରଣେତା ଏବଂ ଦେଶର ଏକତା ଓ ଅଖଣ୍ଡତା ଅକ୍ଷୂର୍ଣ୍ଣ ରଖିବାକୁ ନିଜର ପ୍ରାଣ ଉତ୍ସର୍ଗ କରୁଥିବା ବୀର ଯବାନଙ୍କୁ ମୁଁ ପ୍ରଣିପାତ କରୁଛି । ଆସନ୍ତୁ ସମସ୍ତେ ମିଶି ଗଣତନ୍ତ୍ର ଦିବସ ଅବସରରେ ଆମର ଗଣତାନ୍ତ୍ରିକ ମୂଲ୍ୟବୋଧର ରକ୍ଷା କରିବାକୁ ଶପଥ ନେବା ଏବଂ ପ୍ରଧାନମନ୍ତ୍ରୀ ମୋଦିଙ୍କ ବିକାଶିତ ଭାରତର ସଂକଳ୍ପକୁ ସାକାର କରିବାରେ ନିଜର ଯୋଗଦାନ ଦେବା ।''