ന്യൂഡൽഹി: മിന്നും പ്രകടനം കാഴ്‌ചവെച്ച 9 വയസുകാരിയ്‌ക്ക്‌ അഭിനന്ദനമറിയിച്ച്‌ മാസ്‌റ്റർ ബ്ലാസ്‌റ്റർ സച്ചിൻ ടെണ്ടുൽക്കർ. മൂന്നാം ക്ലാസുക്കാരിയായ ഹർമത്ത് ഇർഷാദ് ഭട്ടിന്‍റെ ഉജ്ജ്വലമായ ഷോട്ടുകളടങ്ങുന്ന വീഡിയോ തന്‍റെ സോഷ്യൽ മീഡിയ അക്കൗണ്ടായ എക്‌സിൽ പങ്കിട്ടിരിക്കുകയാണ്‌ സച്ചിൻ.
ജമ്മു കശ്‌മീര്‍ സോപോറിലെ പജൽപോറ ഗ്രാമത്തില്‍ നിന്നുള്ളതാണീ കൊച്ചുമിടുക്കി. സച്ചിൻ വീഡിയോ പങ്കിട്ടതോടെ ഹർമത്തിന്‌ ആരാധകരേറി, കൂടാതെ നിമിഷങ്ങൾക്കകം തന്നെ വീഡിയോ സോഷ്യൽ മീഡിയയിൽ വൈറലായി. 'പെൺകുട്ടികൾ ക്രിക്കറ്റ് കളിക്കുന്നത് എപ്പോഴും നല്ലതാണ്. അത്തരം വീഡിയോകൾ കാണുമ്പോൾ എന്‍റെ മുഖത്ത് എപ്പോഴും ഒരു പുഞ്ചിരി വിടരും', എന്ന കുറിപ്പോടെയാണ്‌ സച്ചിന്‍ വീഡിയൊ പങ്കുവെച്ചത്‌.