सोलापूर : महाराष्ट्रातील सोलापूर जिल्ह्यातील मंगळवेढा शहरात आज मंगळवार (दि. 21 फेब्रुवारी)रोजी संध्याकाळी एकाच कुटुंबातील तीन महिलांची हत्या झाल्याचे पोलिसांनी सांगितले. या घटनेनंतर मानसिकदृष्ट्या अस्थिर संशयित पुरुषाला ताब्यात घेतले असल्याची माहितीही समोर आली आहे. प्राथमिक माहितीनुसार, नंदेश्वर गावातील लवाटे वस्ती येथे एकाच कुटुंबातील तीन महिलांची दगडाने ठेचून हत्या केल्याचे आढळून आले आहे. पोलिसांनी मृतदेह शवविच्छेदनासाठी पाठवले असून, वरिष्ठ अधिकारी घटनास्थळी आहेत, असे अधिकाऱ्याने सांगितले.
एकाच कुटुंबातील तीन महिलांची निर्घृणपणे हत्या : तालुक्यातील नंदेश्वर गावात मंगळवारी दुपारी एकाच कुटुंबातील तीन महिलांचा मृतदेह आढळून आल्याने खळबळ उडाली आहे. डोक्यात दगड घालून तीन महिलांची हत्या झाल्याने गावात भीतीचे वातावरण पसरले आहे. हत्येचे नेमकं कारण अद्याप अस्पष्ट असल्याचे पोलिसांनी सांगितले आहे. तपासासाठी काही जणांना ताब्यात घेऊन माहिती घेतली जात आहे. मंगळवेढा तालुक्यातील नंदेश्वर येथे एकाच कुटुंबातील तीन महिलांची निर्घृणपणे हत्या करण्यात आली आहे.