नागपूर :काळजी करू नका, तुमची सुरक्षितता आमची जबाबदारी आहे. हिंदूहृदयसम्राट बाळासाहेब ठाकरे समृद्धी महामार्गावरील प्रवाशांच्या सुरक्षिततेला आमचे सर्वोच्च प्राधान्य आहे. यासाठी आवश्यक ती खबरदारी घेण्यात येत आहे, असा विश्वास सार्वजनिक बांधकाम मंत्री (सार्वजनिक उपक्रम) दादाजी भुसे यांनी आज व्यक्त केला आहे. त्यांनी आज समृद्धी महामार्गावरील नागपूरच्या वायफड टोलजवळ प्रवाशांसोबत संवाद साधला. समृद्धी महामार्गावर होणारे अपघात लक्षात घेता अपघात रोखण्यासाठी आखण्यात आलेल्या विविध उपाययोजनांचा आढावा आज भुसे यांनी प्रत्यक्ष समृद्धी महामार्गावर जाऊन घेतला. त्यानंतर त्यांनी प्रवाशांसोबत संवाद साधला आहे.
प्रवाशांनीही नियमांचे पालन करावे :समृद्धी महामार्ग हा नागपूर, मुंबई या शहरांना जोडणारा अत्यंत महत्वाचा महामार्ग आहे. मात्र, गेल्या काही दिवसात या महामार्गावर झालेले अपघात लक्षात घेता, आवश्यक त्या उपाययोजना करण्यात येत आहेत. यासाठी प्रवाशांनीही नियमांचे पालन करीत प्रवास करावा, असे आवाहन त्यांनी यावेळी केले. दादा भुसे यांनी समृद्धी महामार्गाच्या झिरो पॅाईंट तसेच वायफड टोलनाक्याची पाहणी करीत दौऱ्याला सुरुवात केली. यावेळी महाराष्ट्र रस्ते विकास महामंडळाच्या अधिकाऱ्यांनी यावेळी समृद्धी महामार्गाची माहिती दादा भुसे यांना दिली. यात कंट्रोल रुम, वाहनाला आग लागल्यास आग प्रतिबंधात्मक सयंत्र, शीघ्र कृती दल वाहन, वाहनांची टोलनाक्यावर करण्यात येणारी तपासणी, प्रवाशांसाठीचे समुपदेशन केंद्र, ॲम्ब्युल्सची पाहणी केली. यावेळी मंत्रीमहोदयांना आग प्रतिबंधात्मक उपाययोजनांचे प्रात्याक्षिक दाखवण्यात आले.