मुंबई : तंग कपड्यांवरून उर्फी जावेद हिच्या विरोधात भाजप नेत्या चित्रा वाघ आक्रमक झाल्या आहेत. पोलीस ठाण्यात तक्रार देखील वाघ यांनी केली होती. त्यानुसार उर्फीने पोलीस ठाण्यात हजेरी लावली. त्यानंतर आपल्या जीवितास धोका असल्याची भीती व्यक्त करत तिने महिला आयोगाकडे यांसदर्भात तक्रार दाखल केली. राजकीय स्वार्थापोटी भाजप नेत्या चित्रा वाघ यांनी मला मारहाणीच्या धमक्या दिल्या आहेत. त्यामुळे माझ्यावर कधीही जीवघेणा हल्ला होऊ शकतो, असे उर्फीने म्हटले आहे.
उर्फीला सुरक्षा पुरविण्याची सूचना :राज्य महिला आयोगाच्या अध्यक्षा रुपाली चाकणकर यांनी या प्रकरणाची दखल घेत, मुंबई पोलिस आयुक्तांना पत्र लिहून अभिनेत्री उर्फी जावेदला सुरक्षा पुरवण्याची सूचना दिली आहेत. तसेच याबाबत केलेल्या कार्यवाहीचा अहवाल सादर करावा, असे पत्रात नमूद केले आहे. मुक्त संचाराचा हक्क घटनेने प्रत्येक भारतीयाला दिला आहे. महाराष्ट्राची राजधानी असलेल्या मुंबईसारख्या शहरात असुरक्षित वाटणे ही गंभीर बाब आहे. त्यामुळे मुंबई पोलीस आयुक्तांनी यावर तात्काळ कारवाई करावी व केलेल्या कार्यवाहीचा अहवाल राज्य महिला आयोगास सादर करण्याच्या सूचना चाकणकर यांनी दिल्या आहेत.
उर्फी जावेदची काय होती मागणी?यामध्ये अर्जदार उर्फी जावेद असे नमूद करते की, "मी सिनेसृष्टीशी संबंधित असलेल्या फॅशन इंडस्ट्रीमध्ये काम करत आहे. माझे राहणीमान आणि दिसणे व्यावसायिकदृष्ट्या आवश्यक आहे. असे असतानाही भाजपच्या महिला प्रदेशाध्यक्षा चित्रा वाघ यांनी केवळ स्वतःच्या राजकीय फायद्याकरिता किंवा वैयक्तिक प्रसिद्धीकरिता मला मारहाण करण्याच्या धमक्या प्रसारमाध्यमावरून जाहीरपणे दिल्या आहेत. माझ्यावर हल्ला होऊ शकतो. त्यामुळे असुरक्षित वातावरण निर्माण होऊन मला मुक्तपणे वावरता येत नाही. म्हणून मला सुरक्षा व्यवस्था पुरविण्यात यावी. भारतीय राज्यघटनेने प्रत्येक भारतीयाला मुक्त संचाराचा हक्क दिला आहे. महाराष्ट्राची राजधानी असलेल्या मुंबईसारख्या शहरात असुरक्षित वाटणे ही गंभीर बाब आहे. त्यामुळे मुंबई पोलीस आयुक्तांनी यावर तात्काळ कारवाई करावी व केलेल्या कार्यवाहीबाबतचा अहवाल राज्य महिला आयोगास सादर करावा.