मुंबई - आपल्या अभिनय प्रतिभेच्या जोरावर करोडो प्रेक्षकांच्या मनावर राज्य करणाऱ्या मनोज बाजपेयींचा नवा चित्रपट प्रदर्शनासाठी सज्ज झालाय. 'जोराम' या आगामी चित्रपटाचा रोमांचक ट्रेलर लॉन्च करण्यात आलाय. देवाशिष माखिजा द्वारे दिग्दर्शित आणि लिखीत या चित्रपटात मनोज बाजपेयीच्या अभिनय कौशल्याची अप्रतिम झलक पाहायला मिळतेय. जीव घेण्यासाठी मागे लागलेल्या अधिकाऱ्यांचा ससेमिरा चुकवत आपल्या तीन महिन्याच्या मुलीचे रक्षण करणाऱ्या बापाची भूमिका यात मनोजनं साकारली आहे.
दीड मिनिटांच्या 'जोराम'च्या ट्रेलरमध्ये दासरू आपल्या मुलीला घेऊन त्याच्या गावाच्या बदललेल्या जागेतून कायद्याच्या अंमलबजावणीपासून पळून निसटून जाण्याचा प्रयत्न करताना दिसतो. हे घडत असताना तो आपला जीव धोक्यात घालतो. या चित्रपटात झीशान अय्युब पोलिस अधिकारी रत्नाकरची भूमिका साकारताना दिसत आहे. तो मनोज बाजपेयी साकारत असलेल्या दासरु या पात्राचा अथक पाठलाग करत आहे, त्याला पकडण्यासाठी तो कोणत्याही थराला जायला तयार आहे.
या चित्रपटाची कथा दासरूभोवती फिरत असल्याचे दिसते. एक माजी माओवादी असलेला एक व्यक्ती आपल्या नव्या आयुष्याची सुरुवात करतो. आपला भूतकाळ टाळून त्यानं आपल्या मुलीचे चांगले भविष्य सुरक्षित करण्याचा निर्धार केला आहे. 'जोराम' चित्रपटाच्या या ट्रेलरमध्ये अनेक हृदयस्पर्शी प्रसंग घडताना दिसतात. एका वेगळ्या विषयावरील हा चित्रपट मनोज बाजपेयीच्या अभिनयामुळे खूपच वास्तववादी झाल्याचं ट्रेलवरुन दिसतंय.