मुंबई - मुंबईत डिसेंबर महिन्यापासून कोरोना विषाणूची तिसरी लाट आली ( Corona Third wave in December Mumbai ) होती. जानेवारीच्या सुरुवातीला ६ ते ८ जानेवारीदरम्यान सलग तीन दिवस २० हजारच्यावर रुग्ण आढळून आले. त्यानंतर रुग्णसंख्येत घट होऊन २०० ते ३०० रुग्ण आढळून येत होते. त्यात घट होऊन गेले काही दिवस १००च्या आत रुग्ण आढळून येत आहेत. गेल्या २ वर्षातील सर्वात कमी रुग्णांची ही नोंद आहे. आज ६० रुग्ण आढळून आले असून शून्य मृत्यूची नोंद झाली आहे. ( Mumbai Corona Update 8th March 2022 ) मुंबईत सध्या रुग्ण बरे होण्याचा दर ९८ टक्के असून ४६७ सक्रिय रुग्ण आहेत. ( Mumbai Corona Positivity Rate 8th March 2022 )
६० नव्या रुग्णांची नोंद -
मुंबईत आज (८ मार्च) ६० नवे रुग्ण आढळून आले आहेत. तर शून्य मृत्यूची नोंद झाली आहे. आज ७७ रुग्णांना डिस्चार्ज देण्यात आला आहे. आतापर्यंत एकूण १० लाख ५७ हजार ०१६ रुग्णांची नोंद झाली आहे. त्यापैकी १० लाख ३६ हजार ९७४ रुग्ण बरे झाले आहेत. तर १६ हजार ६९२ रुग्णांचा मृत्यू झाला आहे. सध्या ४६७ सक्रिय रुग्ण आहेत. रुग्ण बरे होण्याचे प्रमाण ९८ टक्के तर रुग्ण दुपटीचा कालावधी ७०५६ दिवस इतका आहे. मुंबईत एकही इमारत झोपडपट्टी सील नाही. १ ते ७ मार्च या कालावधीत कोरोना वाढीचा दर ०.०१ टक्के इतका आहे.
९९.२ टक्के बेड रिक्त -
मुंबईत आज आढळून आलेल्या ६० रुग्णांपैकी ५४ म्हणजेच ९० टक्के लक्षणे नसलेले रुग्ण आहेत. आज ६ रुग्णांना रुग्णालयात दाखल करावे लागले. २ रुग्णांना ऑक्सिजन बेडची आवश्यकता भासली आहे. मुंबईत रुग्णालयांमध्ये २९,०७२ बेडस असून त्यापैकी २५२ बेडवर म्हणजेच ०.८ टक्के बेडवर रुग्ण आहेत. इतर ९९.२ टक्के बेड रिक्त आहेत.