श्रीनगर :जम्मू-काश्मीरमधील कुपवाडा जिल्ह्यात शुक्रवारी सकाळी दहशतवादी आणि सुरक्षा जवानांमध्ये चकमक सुरू झाली. यावेळी पाच विदेशी दहशतवाद्यांना भारतीय लष्करी जवानांनी यमसदनी धाडले. मात्र या दहशतवाद्यांची अद्यापही ओळख पटलेली नाही. परिसरात सुरक्षा दलांची शोधमोहीम सुरू आहे. जम्मू-काश्मीर पोलिसांनी चकमकीच्या ठिकाणाहून नागरिकांना सुरक्षित स्थळी हलवले आहे. सध्या चकमक सुरू असल्याची माहिती काश्मीर झोन पोलिसांनी ट्विट करून दिली आहे.
दहशतवाद्यांनी केला जवानांवर गोळीबार :काश्मीरचे एडीजीपी विजय कुमार यांनी कुपवाडा चकमकीत पाच विदेशी दहशतवादी मारले गेल्याची माहिती दिली आहेत. सुरक्षा दलांना कुपवाडा जिल्ह्यातील नियंत्रण रेषेच्या जुमागुंड भागात दहशतवादी लपल्याची गुप्तचर विभागाकडून माहिती मिळाली होती. यानंतर सुरक्षा दल आणि जम्मू-काश्मीर पोलिसांनी संयुक्तपणे परिसराला वेढा घालून शोध मोहीम सुरू केली. तेव्हा सुरक्षा दल शोधमोहिम राबवत असताना त्यांच्यावर गोळीबार करण्यात आला. सुरक्षा दलांनीही प्रत्युत्तर दिले. यादरम्यान दोन्ही बाजूंमध्ये चकमक सुरू झाली. यावेळी पाच विदेशी दहशतवादी मारले गेले आहेत.