भोपाळ- 'काँग्रेसचे सरकार पाडण्यात आम्हाला काहीही रस नाही. तो त्यांच्या पक्षामधील तो अंतर्गत विषय आहे', असे विधान मध्यप्रदेशचे माजी मुख्यमंत्री शिवराज सिंह चौहान यांनी केले आहे. मध्यप्रदेशात भाजप 'ऑपरेश लोटस' राबवत असल्याचे आरोप होत असतानाच माजी मुख्यमंत्र्यांनी हे वक्तव्य केले आहे.
काँग्रेस नेते ज्योतिरादित्य सिंधिया यांचे समर्थक असलेल्या काही आमदारांचे फोन बंद लागत असून, त्यांच्याशी संपर्क होऊ शकत नाहीये. तर त्याव्यतिरिक्त आणखी १७ आमदार बेपत्ता झाले आहेत. या सर्व आमदारांना शेवटचे बंगळुरू विमानतळावर पाहण्यात आले होते. त्यामुळे जोतिरादित्य सिंधिया यांनी बंडाचा झेंडा फडकावल्याची जोरदार चर्चा सुरू आहे. मध्यप्रदेशचे सत्ता नाट्य हरियाणमध्येही पाहायला मिळाले होते. काही काँग्रेसचे आमदार हरियाणातील हॉटेलमध्ये पहायला मिळाले होते. भाजप सत्ता स्थापनेचा कुटील डाव रचत असल्याचा आरोप काँग्रेसच्या नेत्यांनी केला होता.