എറണാകുളം: സിൽവർ ലൈൻ പദ്ധതി സംബന്ധിച്ച സാമൂഹികാഘാത പഠനത്തിന്‍റെ തൽസ്ഥിതി എന്തെന്ന് അറിയിക്കണമെന്ന് സംസ്ഥാന സർക്കാരിനോട് കേരള ഹൈക്കോടതി. പദ്ധതിയിൽ നിന്നും കേന്ദ്ര സർക്കാർ കൈകഴുകിയെന്നും ഹൈക്കോടതി നിരീക്ഷിച്ചു. സിൽവർ ലൈൻ പദ്ധതിയുടെ സർവേകൾക്കെതിരായ ഹർജികൾ പരിഗണിക്കവേയായിരുന്നു കോടതിയുടെ പരാമർശം.
സിൽവർ ലൈൻ നല്ല ആശയമാണെന്നും എന്നാൽ പദ്ധതി നടപ്പാക്കുന്നതിൽ സർക്കാർ ധൃതി കാട്ടിയെന്നും ഹൈക്കോടതി വിമര്‍ശിച്ചു. വിഷയത്തിൽ കോടതിയെ കുറ്റപ്പെടുത്തുന്ന നടപടിയാണ് സർക്കാരിന്‍റെ ഭാഗത്തുനിന്ന് ഉണ്ടായത്. അതിവേഗ റെയിൽപാത സംസ്ഥാനത്തിന് ആവശ്യമാണ്. സിൽവർ ലൈൻ നല്ല പദ്ധതിയാണെങ്കിലും നടപ്പാക്കേണ്ട രീതി ഇതായിരുന്നില്ല. ജനങ്ങളെ വിശ്വാസത്തിലെടുത്തു വേണം പദ്ധതിയുമായി മുന്നോട്ടു പോകാൻ. ദേശീയപാത അതോറിറ്റി ഇങ്ങനെയാണ് കാര്യങ്ങൾ കൈകാര്യം ചെയ്യുന്നതെന്നും കോടതി ചൂണ്ടികാണിച്ചു.