নগাঁৱৰ ভেলাইগাঁৱত বাঘৰ আক্ৰমণত এজন নিহত
নগাঁও, 5 জানুৱাৰী :নগাঁৱৰ ননৈ ভেলাইগাঁৱত বাঘৰ আতংক। ৰাজ্যজুৰি বনৰীয়া হাতী, মহে তাণ্ডৱ চলোৱাৰ পিচতে এইবাৰ বাঘৰ আতংকত ত্ৰাসিত হৈছে লোকসকল ৷ জনঅৰণ্যত বনৰীয়া হাতী ভৈয়ামলৈ আহি ইজনৰ পিচত সিজনক আক্ৰমণ কৰাৰ পিচতেই এইবাৰ বাঘৰ আক্ৰমণৰ ঘটনা সংঘটিত হৈছে ৷
ননৈৰ ভেলাইগাঁৱত শুকুৰবাৰে পুৱাই এটা বাঘে আতংকৰ সৃষ্টি কৰিছে । প্ৰতিদিনৰ দৰে পথাৰত গৰু লৈ যোৱা সময়তেই বাঘৰ আক্ৰমণত এজন লোক থিতাতে নিহত হোৱাৰ লগতে আন এজন লোক গুৰুতৰভাৱে আহত হয় বুলি জানিব পৰা গৈছে । আদিত্য শইকীয়া নামৰ লোকজন থিতাতে নিহত হোৱা বুলি জনাইছে স্থানীয় ৰাইজে। নিজৰ ঘৰৰ চোতালতে বাঘৰ আক্ৰমণত মৃত্যু হয় আদিত্য শইকীয়া নামৰ 60 বছৰীয়া লোকজন।
লগতে সত্য ফুকন নামৰ আন এজন লোক গুৰুতৰভাৱে আহত হয়। সম্প্ৰতি নগাওঁ ভোগেশ্বৰী ফুকননী চিকিৎসালয়ত চিকিৎসাধীন হৈ আছে আহত সত্য ফুকন। বৰ্তমানেও বাঘটো পিঞ্জৰাবদ্ধ হোৱা নাই ।