জনীয়া, ১৪ জুন: বৰপেটা জিলাৰ কলগাছিয়া আৰক্ষী থানাৰ অন্তৰ্গত পূব কলগাছিয়াত সংঘটিত হৈছে এক চাঞ্চল্যকৰ ঘটনা । এজন যুৱকৰ কাণ্ডই সৃষ্টি কৰিছে এই চাঞ্চল্যৰ ৷ ঘটনা অনুসৰি ২৫ বছৰীয়া ৰফিকুল ইছলাম নামৰ যুৱকজনে নিশা হ'লেই ঘূৰি ফুৰে বেলেগৰ ঘৰে ঘৰে । বৃহস্পতিবাৰে নিশাৰ ভাগত তেনে এক ঘটনা সংঘটিত কৰিবলৈ গৈ ধৰা পৰিল ৰাইজৰ হাতত । ৰাইজে বান্ধি থ'লে গৰুৰ পঘাৰে ।
জানিব পৰা মতে ৰফিকুল ইছলাম নামৰ যুৱকজনে এসপ্তাহ পূৰ্বে নিশাৰ ভাগত পূব কলগাছিয়াৰ জয়নাল আবেদিন নামৰ লোকজনৰ ঘৰত থকা এটা বাকচত সোমায় আছিল । কিন্তু জয়নাল আবেদিনে নিশা প্ৰায় তিনি বাজালৈকে ম'বাইলত চিনেমা চাই টোপনি যোৱাৰ পিচত লাহে লাহে ৰফিকুলে বাকচৰ পৰা ওলাই আবেদিনৰ ম'বাইলটো হাতত লৈ দৰ্জা খোলাৰ সময়তে তেওঁ সাৰ পোৱাত ম'বাইলটো থৈ পলায়ন কৰে ।
ইয়াৰ পিচত প্ৰায় প্ৰতিদিনেই যুৱকজনে মাজনিশা ঘৰখনত প্ৰৱেশ কৰে যদিও যুৱকজনক কৰায়ত্ত কৰিবলৈ বাৰে বাৰে ব্যৰ্থ হৈছিল । কিন্তু বৃহস্পতিবাৰে নিশা পুনৰ যুৱকজনে ঘৰখনৰ ভিতৰত প্ৰৱেশ কৰিবলৈ লওতেই গৰাকীয়ে খাপ পিটি থাকি তেওঁক আটক কৰিবলৈ সক্ষম হয় । এই ঘটনাক কেন্দ্ৰ কৰি ঘৰখনত সৃষ্টি হয় এক উত্তপ্ত পৰিস্থিতিৰ ।
লগে লগে যুৱকজনক গৰুৰ পঘাৰে বান্ধি কলগাছিয়া আৰক্ষীক খবৰ দি গতাই দিয়ে । যুৱকজনে কিয় উক্ত ঘৰখনত বাৰে বাৰে প্ৰৱেশ কৰে আৰক্ষীৰ তদন্তৰ পাচতহে ওলাই পৰিব প্ৰকৃত ৰহস্য । যুৱকজনে চুৰিৰ নে আন কোনো উদ্দেশ্যৰে লোকজনৰ ঘৰত প্ৰৱেশ কৰে সেয়া পৰৱৰ্তী সময়তহে পোহৰলৈ আহিব ।
