লখিমপুৰ, 22 আগষ্ট:বিতৰ্কই লগ এৰা নাই লখিমপুৰ চিকিৎসা মহাবিদ্যালয়ক (Lakhimpur medical college controversy)। উদ্বোধনৰ পাছৰে পৰা নানা বিতৰ্কৰ আওতাত সোমাই পৰা চিকিৎসা মহাবিদ্যালয়খনত এইবাৰ ওলাইছে চিটি স্কেনৰ নামত ধন সৰকোৱাৰ নতুন পদ্ধতি ৷ এইবাৰ চিটি স্কেনৰ নামত ৰোগীৰ পৰা ধন লোৱাৰ অভিযোগ উত্থাপন হৈছে চিকিৎসা মহাবিদ্যালয় কৰ্তৃপক্ষৰ বিৰুদ্ধে (Medical college authorities accused of charging name of CT scans) ৷
জেনেৰেটৰত তেল নথকাৰ বাবে প্ৰসুতিৰ মৃত্যু হোৱা, দেৱাল ফাটি যোৱাকে ধৰি বহু বিতর্কই জোকাৰি যোৱাৰ পাছত এইবাৰ লখিমপুৰ চিকিৎসা মহাবিদ্যালয়ত চিটি স্কেনৰ নামত ধনৰ লেনদেন হোৱাৰ গুৰুতৰ অভিযোগ উত্থাপন কৰিছে খোদ ৰোগীয়ে ৷ দেওবাৰে হেমলতা শইকীয়া, উৰ্মিলা দাস নামৰ ৰোগী দুগৰাকীৰ পৰা চিটি স্কেন কৰাৰ নামত মেডিকেল কৰ্তৃপক্ষই 1600 টকাকৈ লয় ৷ কিন্তু পৰৱৰ্তী সময়ত হাস্পতাল কৰ্তৃপক্ষই ৰোগীক প্ৰদান নকৰিলে কোনো ধন আদায় কৰাৰ ৰচিদ ৷ ৰোগীৰ পৰিয়ালে এই ধন কিয় লোৱা হৈছে সোধাত চিটি স্কেনত প্ৰয়োজন হোৱা ঔষধৰ নাটনি হোৱাৰ বাবে এই ধন লোৱা বুলি মন্তব্য প্ৰকাশ কৰে কৰ্তৃপক্ষই ৷
ইয়াৰ পিছতে ৰোগীৰ পৰিয়াল দুটাই হুলস্থুল পৰিৱেশৰ সৃষ্টি কৰাৰ পিছতেই চিকিৎসা মহাবিদ্যালয় কৰ্তৃপক্ষই উৰ্মিলা দাসৰ পৰিয়ালক ধনখিনি ঘূৰাই দিয়ে ৷ কিন্তু এতিয়ালৈ ধন ঘূৰাই নাপালে হেমলতা শইকীয়াৰ পৰিয়ালে ৷