ডিফু, 21 অক্টোবৰ: কাৰ্বি আংলং জিলাৰ প্ৰাক্তন বিদ্ৰোহী সংগঠনৰ উমৈহতীয়া মঞ্চ কেৰাফ’ই শুকুৰবাৰে ডিফুত এক সংবাদমেলৰ আয়োজন কৰে ৷ সংবাদমেলৰ জৰিয়তে কাৰ্বি শান্তি চুক্তি 2021 আৰু ইউপিডিএছৰ শান্তি চুক্তি 2011 সম্পূৰ্ণ নকৰাৰ বাবে ভাৰত আৰু অসম চৰকাৰৰ বিৰুদ্ধে বিষোদগাৰ প্ৰকাশ কৰে ৷ কেএলএনএফৰ প্ৰাক্তন প্ৰচাৰ সচিব ৰেজাক ডেৰাই এই সন্দৰ্ভত কয় যে, 2021 চনত সম্পন্ন হোৱা কাৰ্বি শান্তি চুক্তিয়ে দুটা বছৰ অতিক্ৰম কৰিলে যদিও এই চুক্তিৰ বহু দফা আজিও সম্পূৰ্ণ নহ’ল ৷
সংবাদমেলত সংগঠনটোৱে কয় যে, ভাৰত চৰকাৰে দুটা বছৰৰ ভিতৰত এই চুক্তিৰ সকলো দফা কাৰ্যকৰী কৰা হ’ব বুলি প্ৰতিশ্ৰুতি দিছিল যদিও বহু প্ৰতিশ্ৰুতি আজিও পূৰণ নহ'ল ৷ ইফালে কাৰ্বি আংলং জিলাত দেশৰ প্ৰধানমন্ত্ৰীগৰাকী উপস্থিত হৈ এখন কৃষি মহাবিদ্যালয়, পশু পালন মহাবিদ্যালয় আৰু ডিগ্ৰী কলেজৰ আধাৰশিলা স্থাপন কৰিছিল যদিও আজিলৈকে এই তিনিখন প্ৰতিষ্ঠান স্থাপনৰ কামৰ অগ্ৰগতি নোহোৱাত তেওঁলোকে সংবাদমেলত ক্ষোভ প্ৰকাশ কৰে ৷ অৱশ্যে তেওঁলোকে সৈনিক স্কুল স্থাপনৰ চৰকাৰৰ পদক্ষেপক আদৰণি জনায় ৷
সাংসদ হৰেণছিং বে'ক আগন্তুক সংসদৰ অধিৱেশনত এই বিষয়সমূহ উত্থাপন কৰিবলৈ আহ্বান জনায় কেৰাফ’ই ৷ লগতে প্ৰাক্তন বিদ্ৰোহী সংস্থাপনৰ ক্ষেত্ৰত প্ৰশ্ন তুলি সংগঠনটোৱে কয় যে, ভাৰত চৰকাৰে চাৰি লাখ টকা ফিক্সড ডেপজিট আৰু কাৰ্বি আংলং স্বায়ত্ত শাসিত পৰিষদে পঞ্চাছ হাজাৰ টকা প্ৰদান কৰোতেই সংস্থাপন সম্পূৰ্ণ হ'ল নেকি ৷ সংস্থাপনৰ বিষয়টো গুৰুত্ব সহকাৰে লৈ শীঘ্ৰে প্ৰাক্তন বিদ্ৰোহীসকলৰ ক্ষেত্ৰত জলপানিৰ ব্যৱস্থা কৰিবলৈ আহ্বান জনায় ৷