গুৱাহাটী, ১৭ জুন: ৰাজ্যত বান পৰিস্থিতিয়ে ক্ৰমাৎ জটিল ৰূপ ধাৰণ কৰিছে (Assam Flood 2023) । যোৱা কেইবাদিন ধৰি হৈ থকা নিৰৱচ্ছিন্ন বৰষুণৰ ফলত এখনৰ পাছত আনখন জিলা বানৰ কবলত পৰিছে । লখিমপুৰ, ধেমাজি আৰু ডিব্ৰুগড়ৰ পাছত শেহতীয়াকৈ বিশ্বনাথ, দৰং, তামুলপুৰ আৰু ওদালগুৰি জিলা বানৰ কৱলত পৰিছে । অসম ৰাজ্যিক দুর্যোগ ব্যৱস্থাপনা প্ৰাধিকৰণে প্ৰকাশ কৰা শেহতীয়া তথ্য অনুসৰি, সাতখন জিলাৰ ৭৭খন গাঁৱৰ ৩৪ হাজাৰ ১৮৯জন লোক বানৰ ফলত প্ৰভাৱিত হৈছে। বান প্রভাৱিত লোকসকলৰ ভিতৰত ২২,৪৬৬জনেই হৈছে লখিমপুৰ জিলাৰ নাওবৈচাৰ । বানত এতিয়ালৈকে বুৰ গৈছে ২১০ হেক্টৰ কৃষিভূমি (Orange alert in Assam) ।
বন্যার্তসকলক সহায়ৰ বাবে সংশ্লিষ্ট জিলা প্ৰশাসনে নাওবৈচাত সাতটা, উত্তৰ লখিমপুৰত, ধেমাজি আৰু কলাইগাঁৱত এটাকৈ বান সাহায্য বিতৰণ কেন্দ্র স্থাপন কৰাৰ লগতে কলাইগাঁৱত এটা বান আশ্রয় শিবিৰ মুকলি কৰিছে । ওদালগুৰিৰ কলাইগাঁৱৰ বান আশ্রয় শিবিৰত বৰ্তমান ২১জন বন্যার্তই আশ্রয় লৈ আছে । বানৰ ফলত এতিয়ালৈকে সৰু-বৰ মুঠ ৯,১১৯ পশুধন প্ৰভাৱিত হৈছে । বাঢ়নী পানীয়ে লখিমপুৰ, ওদালগুৰি, বিশ্বনাথ, গোলাঘাট, তামুলপুৰত পথ, দলং, মথাউৰিকে ধৰি আন্তঃগাঁথনিৰ বিস্তৰ ক্ষতি কৰিছে । আনহাতে, ডিমা হাছাওত আজিও ভূমিস্খলন হৈছে।