গুৱাহাটী, ৯ জুন : অসমবাসীৰ বাবে ভাল খবৰ । ৰাইমনাৰ পাছত দিহিং পাটকাইক ৰাষ্ট্ৰীয় উদ্যান হিচাপে ঘোষণা কৰিলে ৰাজ্য চৰকাৰে । কাজিৰঙা, ওৰাং, নামেৰি, ডিব্ৰু চৈখোৱা আৰু মানাহ ৰাষ্ট্ৰীয় উদ্যানৰ পিছত আন দুখন বনাঞ্চলক ৰাষ্ট্ৰীয় উদ্যানলৈ উন্নীতকৰণ কৰা হ'ল । বিশ্ব পৰিৱেশৰ দিনটোত বিটিআৰৰ ৰাইমনা সংৰক্ষিত বনাঞ্চলক ৰাষ্ট্ৰীয় উদ্যানলৈ উন্নীতকৰণ কৰাৰ পিছতেই বুধবাৰে আন এক গুৰুত্বপূৰ্ণ সিদ্ধান্ত গ্ৰহণ কৰিলে ৰাজ্য চৰকাৰে । দিহিং পাটকাইক ৰাষ্ট্ৰীয় উদ্যান হিচাপে ঘোষণা কৰিলে ৰাজ্য চৰকাৰে । বনমন্ত্ৰী পৰিমল শুক্লবৈদ্যই বুধবাৰে সংবাদমেল যোগে এই কথা সদৰি কৰে ।
গুৱাহাটীৰ 'অৰণ্য ভৱন'ত আয়োজন কৰা এখন সংবাদমেলত বনমন্ত্রী পৰিমল শুক্লবৈদ্যই কয়- বিগত বৰ্ষৰ ডিচেম্বৰ মাহত দিহিং পাটকাই অভয়াৰণ্য ৰাজ্যপালৰ অনুমোদন ক্ৰমে ৰাষ্ট্ৰীয় উদ্যানৰ স্বীকৃতি দিয়া হৈছিল । তাৰ পিছতেই বুধবাৰে ইয়াক আনুষ্ঠানিকভাৱে ঘোষণা কৰা হয় । ৰাইমনা আৰু দিহিং পাটকায়ে আজিৰে পৰা আনুষ্ঠানিকভাৱে ৰাষ্ট্ৰীয় উদ্যানৰ মৰ্যদা লাভ কৰিলে । ৰাষ্ট্ৰীয় উদ্যানৰ ক্ষেত্রত অসম দেশৰ ভিতৰত দ্বিতীয় স্থানলৈ উন্নীত হ'ল ।