গুৱাহাটী, ২৭ নৱেম্বৰ:এতিয়াৰে পৰা লোকসেৱা আয়োগে অনুষ্ঠিত কৰা প্ৰশাসনিক সেৱাৰ প্ৰাথমিক আৰু মূল পৰীক্ষা উভয়তে অসমীয়া ভাষাত ভাগ ল’ব পাৰিব পৰীক্ষাৰ্থীয়ে । শনিবাৰে ৰাজ্য চৰকাৰে গ্ৰহণ কৰিছে এই সিদ্ধান্ত । শনিবাৰে বিয়লি গুৱাহাটীত এখন সংবাদমেলত এই গুৰুত্বপূৰ্ণ ঘোষণা কৰে মুখ্যমন্ত্ৰী ড৹ হিমন্তবিশ্ব শৰ্মাই । এয়া এক যুগান্তকাৰী সিদ্ধান্ত বুলি অভিহিত কৰি মুখ্যমন্ত্ৰীয়ে আৰু কয় যে, তেওঁ মুঠেও অৱগত নাছিল যে অসম প্ৰশাসনিক সেৱাৰ পৰীক্ষাত অসমীয়া ভাষাত ভাগ লোৱাৰ কোনো ব্যৱস্থা ইমানদিনে নাছিল(Assamese language in APSC exam) ।
কিন্তু দুজন যুৱকে কালি হোৱাটচআপ মেছেজ যোগে তেওঁক এই বিষয়ে অৱগত কৰে । ইয়াৰ পিছতেই আজি তাৎক্ষণিক ভাবে চৰকাৰে সিদ্ধান্ত গ্ৰহণ কৰে যে এতিয়াৰে পৰা অসমীয়া ভাষাতো লিখাৰ ব্যৱস্থা থাকিব । আনহাতে, বঙাইগাঁও কেবিনেটত লোকসেৱা আয়োগৰ পৰীক্ষাৰ পৰা অসমীয়া ভাষাৰ বিষয়টো প্ৰত্যাহাৰ কৰিবলৈ লোৱা সিদ্ধান্ত (Removing Assamese language in APSC exam) সম্পৰ্কে বিভিন্ন পক্ষই একো নজনাকৈয়ে চিঞৰ বাখৰ কৰিছে বুলি তেওঁ মন্তব্য কৰে ।
মুখ্যমন্ত্ৰীয়ে কয় যে অসমীয়া ভাষাৰ এখন কাকত লোকসেৱা আয়োগৰ পৰীক্ষাত বাধ্যতামূলক কৰা সিদ্ধান্তটো ২০১৮ চনত সৰ্বানন্দ সোণোৱালৰ চৰকাৰৰ (Sarbananda sonowal government in Assam)সময়তে লোৱা হৈছিল যাৰ বিৰুদ্ধে একাংশ অসমীয়া লৰা-ছোৱালীয়েই উচ্চ ন্যায়ালয়ত গোচৰ তৰিছিল ।